അനില്‍ ആന്റണിയെ പത്തനംതിട്ട അറിയില്ല; പിന്നെ ശ്രമിച്ചുനോക്കാം: പിസി ജോർജ്
ലോക്സഭാ തെരഞ്ഞെടുപ്പിലേക്ക് ബിജെപി പുറത്തുവിട്ട ആദ്യഘട്ട സ്ഥാനാര്‍ത്ഥി പട്ടികയില്‍ നീരസം പ്രകടിപ്പിച്ച് പി സി ജോര്‍ജ്. മണ്ഡലത്തിലെ സ്ഥാനാര്‍ത്ഥിയായ അനില്‍ ആന്റണിയെ പത്തനംതിട്ടയിലെ വോട്ടര്‍മാര്‍ക്ക് പരിചയമില്ലെന്ന് പി സി ജോര്‍ജ് പറഞ്ഞു.
‘അനില്‍ ആന്റണിയെ പത്തനംതിട്ട മണ്ഡലത്തിൽ അറിയില്ല. കൂടുതൽ ഓട്ടം കൂടുതല്‍ വേണ്ടി വരും. സ്ഥാനാര്‍ത്ഥിയായി ഞാന്‍ ഓടുന്നതില്‍ കൂടുതല്‍ ഓടിയാല്‍ മാത്രമേ അനില്‍ ആന്റണിയെ പരിചയപ്പെടുത്താനാകൂ. ആ ഒരു ദുഃഖമുണ്ട്. പിന്നെ ശ്രമിച്ചുനോക്കാം.’ പി സി പറഞ്ഞു.
ഇതോടൊപ്പം ,യുഡിഎഫ് സ്ഥാനാര്‍ത്ഥിയായ ആന്റോ ആന്റണിക്ക് അനുകൂലമായ ഒരു തരംഗം മണ്ഡലത്തില്‍ ഇല്ലെന്നും പി സി ജോര്‍ജ് പറഞ്ഞു. പത്തനംതിട്ടയില്‍ ഞാന്‍ സ്ഥാനാര്‍ത്ഥിയായി വരരുതെന്ന് ആഗ്രഹിച്ചത് പിണറായി വിജയനും വെള്ളാപ്പള്ളി നടേശനുമാണ്. തുഷാര്‍ വെള്ളാപ്പള്ളിയും ആഗ്രഹിച്ചിരുന്നു. എനിക്ക് സ്ഥാനാര്‍ത്ഥിത്വം വേണ്ടെന്ന് ഞാന്‍ പറഞ്ഞിരുന്നു.
എന്നാല്‍ പത്തനംതിട്ടയില്‍ പി സി ജോര്‍ജിനെ സ്ഥാനാര്‍ത്ഥി ആക്കണമെന്ന് എന്‍ഡിഎ നേതാക്കള്‍ ആഗ്രഹിച്ചിരുന്നു. അത് നേതൃത്വത്തെ അറിയിച്ചിരുന്നു. അവരൊക്കെ പറഞ്ഞപ്പോള്‍ സ്ഥാനാര്‍ത്ഥിയായാല്‍ എന്താ കുഴപ്പമെന്ന് ഞാനും ആഗ്രഹിച്ചു. സന്തോഷം മാത്രമാണ്.’ എന്നും പി സി ജോര്‍ജ് കൂട്ടിച്ചേര്‍ത്തു.
