വിവാഹിതനാണെന്ന കാര്യം അറിഞ്ഞിട്ടും ബന്ധം തുടര്ന്ന ശേഷം വിവാഹ വാഗ്ദാനം നല്കി പീഡിപ്പിച്ചുവെന്ന പരാതി നിലനില്ക്കില്ല ; ഹൈക്കോടതി
കൊച്ചി: വിവാഹിതനാണെന്ന കാര്യം അറിഞ്ഞിട്ടും ബന്ധം തുടര്ന്ന ശേഷം വിവാഹ വാഗ്ദാനം നല്കി പീഡിപ്പിച്ചുവെന്ന പരാതി നിലനില്ക്കില്ലെന്ന് ഹൈക്കോടതി.
മുപ്പത്തിമൂന്നുകാരനെതിരായ ബലാത്സംഗ കേസ് റദ്ദാക്കിക്കൊണ്ടാണ് കോടതിയുടെ നിരീക്ഷണം.
വിവാഹ വാഗ്ദാനത്തില് നിന്നും പുരുഷന് പിന്മാറിയാല്, നേരത്തെ ഉഭയസമ്മതത്തോടെ നടത്തിയ ലൈംഗിക ബന്ധം ബലാത്സംഗമായി കാണാന് കഴിയില്ലെന്ന് കോടതി പറഞ്ഞു. അല്ലാത്തപക്ഷം ലൈംഗികബന്ധത്തിനുള്ള സമ്മതം ദുരുദ്ദേശ്യത്തോടെ നേടിയതാണെന്നോ വിവാഹ വാഗ്ദാനം പാലിക്കാന് ഉദ്ദേശ്യമില്ലാതെ നല്കിയതാണെന്നോ തെളിയിക്കാനാവണമെന്ന് ജസ്റ്റിസ് കൗസര് എടപ്പഗത്ത് ചൂണ്ടിക്കാട്ടി.
ഇരുവരും തമ്മിലുള്ള ബന്ധം ഉഭയസമ്മതത്തോടെ ആയിരുന്നെന്ന് വ്യക്തമാണ്. ചതിക്കണമെന്ന ഉദ്ദേശ്യത്തോടെയാണ് പുരുഷന് വിവാഹ വാഗ്ദാനം നല്കിയതെന്ന് തെളിയിക്കാന് കഴിഞ്ഞിട്ടില്ലെന്നും കോടതി പറഞ്ഞു. എഫ്ഐആര് റദ്ദാക്കണമെന്ന് ആവശ്യപ്പെട്ട് യുവാവ് നല്കിയ ഹര്ജി കോടതി അനുവദിച്ചു. വിവാഹമോചനത്തിന് ശ്രമിച്ചുകൊണ്ടിരിക്കുകയാണെന്ന വാക്കു വിശ്വസിച്ചാണ് ബന്ധം തുടര്ന്നതെന്ന യുവതിയുടെ വാദം ഹൈക്കോടതി തള്ളി.