പ്രധാനമന്ത്രി എന്ത് പറഞ്ഞാലും മീഡിയ കവറേജ് കിട്ടും;പ്രതിപക്ഷ ശബ്ദങ്ങൾ അടിച്ചമർത്തപ്പെടുന്നു: കെസി വേണുഗോപാൽ

പ്രധാനമന്ത്രി നരേന്ദ്ര മോദി യഥാർത്ഥ പ്രശ്‌നങ്ങൾ ജനങ്ങളിൽ നിന്ന് വഴിതിരിച്ചുവിടാൻ ശ്രമിക്കുകയാണ് എന്ന് കെസി വേണുഗോപാൽ. ബിജെപിയുടെയും കേന്ദ്ര സർക്കാരിൻ്റെയും ഏക അജണ്ട ധ്രുവീകരണമാണ്. കേരളത്തിൽ യു.ഡി.എഫ് മുന്നണിക്ക് ക്ലീൻ സ്വീപ്പാണ് ഇത്. ബിജെപി സംസ്ഥാനത്ത് അക്കൗണ്ട് തുറക്കാൻ പോകുന്നില്ലെന്നും അദ്ദേഹം പറഞ്ഞു . ദേശീയ മാധ്യമമായ ഹിന്ദുവിന് നൽകിയ അഭിമുഖത്തിൽ സംസാരിക്കുകയായിരുന്നു വേണുഗോപാൽ.

കോൺഗ്രസ് ഉന്നയിക്കുന്ന തിരഞ്ഞെടുപ്പ് വിഷയങ്ങൾ ജനങ്ങൾ സ്വീകരിക്കുന്നുണ്ടോ എന്ന ചോദ്യത്തിന് വളരെയധികം എന്നാണ് അദ്ദേഹം മറുപടി പറഞ്ഞത്. ഇപ്പോൾ രാജ്യത്തെ സ്ഥിതിഗതികൾ ആകെ മാറുകയാണ്. പ്രാധാന്യമുള്ള വിഷയങ്ങളിൽ നിന്ന് ജനങ്ങളുടെ ശ്രദ്ധ തിരിക്കാനാണ് പ്രധാനമന്ത്രി ശ്രമിക്കുന്നതെന്നും വേണുഗോപാൽ ചൂണ്ടിക്കാട്ടി.

ധ്രുവീകരണമാണ് അവരുടെ ഏക അജണ്ട. യഥാർത്ഥ പ്രശ്‌നങ്ങളിൽ നിന്ന് ശ്രദ്ധ തിരിക്കാനുള്ള ബിജെപിയുടെയും കേന്ദ്ര സർക്കാരിൻ്റെയും വ്യക്തമായ തന്ത്രങ്ങളാണിവയെന്ന് ജനങ്ങൾ തിരിച്ചറിഞ്ഞു തുടങ്ങിയിരിക്കുന്നു. പ്രകടനപത്രിക പുറത്തിറക്കുന്നതിന് മുമ്പ് തന്നെ അഞ്ച് ഉറപ്പുകളാണ് കോൺഗ്രസ് പ്രഖ്യാപിച്ചത്. ജനങ്ങളെ ബാധിക്കുന്ന പ്രശ്‌നങ്ങൾക്കാണ് ഞങ്ങൾ പ്രാധാന്യം നൽകുന്നതെന്നാണ് ഇത് കാണിക്കുന്നത്. ഇത് ഒരു നല്ല അന്തരീക്ഷം സൃഷ്ടിച്ചു, ആളുകൾ അത് സ്വീകരിക്കുന്നു.

വീണ്ടും അധികാരത്തിൽ എത്തുകയാണെന്ന ധാരണ സൃഷ്ടിക്കാൻ ബിജെപിക്ക് കഴിഞ്ഞതിന്റെ കാരണം മാധ്യമങ്ങളാണ് എന്ന് വേണുഗോപാൽ കുറ്റപ്പെടുത്തി . “മുഴുവൻ മാധ്യമങ്ങളെയും ഞാൻ കുറ്റപ്പെടുത്തുന്നില്ല. ഒരു വിഭാഗം മാധ്യമങ്ങൾ പ്രധാനമന്ത്രിക്കും ബി.ജെ.പിക്കും വ്യാപകമായ വാർത്ത നൽകുന്നുണ്ട്. പ്രധാനമന്ത്രി എന്ത് പറഞ്ഞാലും കവറേജ് കിട്ടും. അതേസമയം പ്രതിപക്ഷ ശബ്ദങ്ങൾ അടിച്ചമർത്തപ്പെടുന്നു.”- അദ്ദേഹം പറഞ്ഞു..

നേരത്തെ 2004ലെ തെരഞ്ഞെടുപ്പിൽ അടൽ ബിഹാരി വാജ്‌പേയി പ്രധാനമന്ത്രിയായിരുന്ന കാലത്ത് ഇന്ത്യ ഷൈനിംഗ് എന്ന ഇതേ തരത്തിലുള്ള പ്രചാരണം ആരംഭിച്ചിരുന്നു. തെരഞ്ഞെടുപ്പിന് ശേഷം എന്താണ് സംഭവിച്ചതെന്ന് എല്ലാവർക്കും അറിയാം (തെരഞ്ഞെടുപ്പിൽ ബിജെപി പരാജയപ്പെട്ടു). ഇപ്പോൾ, പ്രധാനമന്ത്രി തന്നെ ഒരു ധാരണ സൃഷ്ടിക്കുന്നു, നിർഭാഗ്യവശാൽ, മാധ്യമങ്ങൾ അതിന് വിശാലമായ കവറേജ് നൽകുന്നു വെന്നും അദ്ദേഹം ചൂണ്ടിക്കാട്ടി.

ഇതോടൊപ്പം ചില സ്പോൺസർ ചെയ്ത സർവേകളും അവകാശവാദങ്ങളെ പിന്തുണച്ച് വരുന്നു. സർവേയിലല്ല ജനങ്ങളുടെ മനസ്സിലാണ് ഞങ്ങൾ വിശ്വസിക്കുന്നത്. ജനങ്ങളും രാജ്യത്തിൻ്റെ മാനസികാവസ്ഥയും കോൺഗ്രസിനും ഇന്ത്യയ്ക്കും (ഇന്ത്യൻ നാഷണൽ ഡെവലപ്‌മെൻ്റൽ ഇൻക്ലൂസീവ് അലയൻസ്) അനുകൂലമാണ്. 2024ലെ ലോക്‌സഭാ തിരഞ്ഞെടുപ്പിൽ വിജയിക്കുമെന്ന ആത്മവിശ്വാസത്തിലാണ് ഞങ്ങൾ. പ്രധാനമന്ത്രിയും ബിജെപിയും ഉണ്ടാക്കിയ ധാരണ ക്രമേണ കുറയുമെന്നും കെസി വേണുഗോപാൽ അഭിപ്രായപ്പെട്ടു.