രാഷ്ട്രീയം പറഞ്ഞ് അയോധ്യ ചടങ്ങ് ബഹിഷ്‌ക്കരിക്കുന്നത് ഈശ്വര നിന്ദ; കോൺഗ്രസ് നിലപാടിനെതിരെ വിമർശനവുമായി എൻഎസ്‍എസ്
10 January 2024
അയോധ്യയിലെ രാമക്ഷേത്ര പ്രതിഷ്ഠാ ചടങ്ങിനെ പിന്തുണച്ചുകൊണ്ടും ചടങ്ങിൽ നിന്ന് വിട്ടുനിൽക്കുമെന്ന കോൺഗ്രസ് നിലപാടിനെ വിമർശിച്ചും സാമുദായിക സംഘടനയായ എൻഎസ്‍എസ് രംഗത്ത്. രാഷ്ട്രീയം പറഞ്ഞ് അയോധ്യ ചടങ്ങ് ബഹിഷ്‌ക്കരിക്കുന്നത് ഈശ്വര നിന്ദയാണെന്ന് എൻഎസ്‍എസ് ജനറൽ സെക്രട്ടറി ജി സുകുമാരൻ നായർ പറഞ്ഞു. ചടങ്ങിൽ പങ്കെടുക്കേണ്ടത് ഈശ്വര വിശ്വാസിയുടെ കടമയാണെന്നും എൻഎസ്‍എസ് പുറത്തിറക്കിയ വാർത്താകുറിപ്പിൽ പറയുന്നു.
അതേസമയം കോൺഗ്രസിന്റെ പേര് പറയാതെയാണ് ഈ വിമർശനം. ക്ഷേത്ര നിർമ്മാണത്തെ പിന്തുണക്കുന്നത് വിശ്വാസത്തിന്റെ പേരിലാണെന്നും എൻഎസ്‍എസ് പറയുന്നു. ചടങ്ങിൽ പങ്കെടുക്കില്ലെന്ന് കോൺഗ്രസ് വ്യക്തമാക്കിയതിന് പിന്നാലെയാണ് വിമർശനം ഉയർന്നത്.
