മോദി ഒബിസി അല്ല ,ഒരു കർഷകൻ്റെയും കൈ പിടിക്കില്ല; അദാനിക്ക് മാത്രമേ ഹസ്തദാനം നൽകൂ: രാഹുൽ ഗാന്ധി

പ്രധാനമന്ത്രി നരേന്ദ്ര മോദി കള്ളം പറഞ്ഞ് ജനങ്ങളെ തെറ്റിദ്ധരിപ്പിക്കുകയാണെന്ന് കോൺഗ്രസ് നേതാവും എംപിയുമായ രാഹുൽ ഗാന്ധി. പ്രധനമന്ത്രി പിന്നോക്ക വിഭാഗത്തിൽ ജനിച്ച ആളല്ല, ജനറൽ വിഭാഗത്തിൽപ്പെട്ട കുടുംബത്തിലാണ് പ്രധാനമന്ത്രി ജനിച്ചതെന്നും ഒഡീഷയിലെ ഭാരത് ജോഡോ ന്യായ യാത്രയിൽ സംസാരിക്കവേ രാഹുൽ ഗാന്ധി പറഞ്ഞു.

‘താൻ ഒബിസിക്കാരൻ ആണെന്ന് പറഞ്ഞ് മോദി ജനങ്ങളെ തെറ്റിദ്ധരിപ്പിക്കുകയാണ്. ‘തെലി’ എന്ന ജാതിയിൽപ്പെട്ട ഒരു കുടുംബത്തിലാണ് അദ്ദേഹം ജനിച്ചത്. 2000ൽ, ഗുജറാത്തിലെ ബിജെപി സർക്കാർ ഈ വിഭാഗത്തെ ഒബിസി പട്ടികയിൽ ഉൾപ്പെടുത്തുകയായിരുന്നു. അതിനാൽ തന്നെ മോദി ജന്മം കൊണ്ട് ഒബിസി അല്ല’- രാഹുൽ അവകാശപ്പെട്ടു.

‘എനിക്ക് ഒരു സർട്ടിഫിക്കറ്റും ആവശ്യമില്ല, മോദി ഒബിസി അല്ലെന്ന് എനിക്ക് എങ്ങനെ അറിയാം എന്ന് ചോദിക്ക്? അദ്ദേഹം ഒരു ഒബിസിയെയും കെട്ടിപ്പിടിക്കുന്നില്ല. ഒരു കർഷകൻ്റെയും കൈ പിടിക്കില്ല. ഒരു തൊഴിലാളിയുടെയും കൈ പിടിക്കുന്നില്ല. മോദി അദാനിക്ക് മാത്രമേ ഹസ്തദാനം നൽകൂ. മോദി ലോകത്തോട് കള്ളം പറയുകയാണ്. ജാതി സെൻസസ് നടത്താൻ ബിജെപിക്ക് കഴിയില്ല. രാഹുൽ ഗാന്ധിക്കും കോൺഗ്രസിനും മാത്രമേ കഴിയൂ, എഴുതിവെച്ചോളൂ!!’ – രാഹുൽ കൂട്ടിച്ചേർത്തു.