യുപിഐ ഇടപാടുകൾക്ക് ഫീസ് ; നരേന്ദ്ര മോദി അമേരിക്കയ്ക്ക് മുൻപിൽ കീഴടങ്ങുകയാണെന്ന് രാഹുൽ ഗാന്ധി
ഇന്ത്യയിൽ ഏറെ ജനപ്രിയമായ യുപിഐ ഇടപാടുകൾക്ക് ഫീസ് ഏർപ്പെടുത്താനുള്ള നീക്കങ്ങൾക്കെതിരെ പ്രധാനമന്ത്രി നരേന്ദ്ര മോദിയെ രൂക്ഷമായി വിമർശിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി.ഭാരതത്തിലെ ഡിജിറ്റൽ സാമ്പത്തിക രംഗം വിദേശ കമ്പനികൾക്ക് തുറന്നുകൊടുക്കാനും അമേരിക്കൻ താല്പര്യങ്ങൾക്ക് മുന്നിൽ കീഴടങ്ങാനുമാണ് സർക്കാർ ശ്രമിക്കുന്നതെന്ന് അദ്ദേഹം ആരോപിച്ചു.സാധാരണക്കാരും ചെറുകിട വ്യാപാരികളും ഉപയോഗിക്കുന്ന സൗജന്യ ഡിജിറ്റൽ സേവനങ്ങൾക്ക് മേൽ പണമിടപാട് ഫീസ് ഈടാക്കുന്നത് ജനങ്ങളോടുള്ള വഞ്ചനയാണെന്ന് രാഹുൽ ഗാന്ധി കുറ്റപ്പെടുത്തി.
അമേരിക്കൻ കാർഡ് കമ്പനികളുടെയും വിദേശ ധനകാര്യ സ്ഥാപനങ്ങളുടെയും സമ്മർദ്ദത്തിന് വഴങ്ങിയാണ് കേന്ദ്ര സർക്കാർ ഇത്തരമൊരു നിലപാടിലേക്ക് നീങ്ങുന്നത്.ഇന്ത്യൻ വിപണിയിൽ തദ്ദേശീയമായി വികസിപ്പിച്ച യുപിഐ സംവിധാനം വൻ വിജയമായതോടെ വിദേശ കമ്പനികളുടെ സാമ്പത്തിക ലാഭത്തെ അത് സാരമായി ബാധിച്ചിരുന്നു.ഇതോടെയാണ് യുപിഐ സേവനങ്ങൾക്കും വിസ, മാസ്റ്റർകാർഡ് പോലുള്ള കമ്പനികൾക്ക് സമാനമായി നിരക്കുകൾ ഈടാക്കാൻ അന്താരാഷ്ട്ര സമ്മർദ്ദം ഉയർന്നത്.
കേന്ദ്ര സർക്കാരിന്റെ ഈ നീക്കം സാധാരണക്കാരായ കോടിക്കണക്കിന് ഉപയോക്താക്കളുടെ പ്രതിമാസ ചെലവുകൾ വർദ്ധിപ്പിക്കുമെന്ന് പ്രതിപക്ഷം ചൂണ്ടിക്കാണിക്കുന്നു.ചെറുകിട കച്ചവടക്കാരെയും തെരുവ് വ്യാപാരികളെയും ഡിജിറ്റൽ വിപ്ലവത്തിന്റെ ഭാഗമാക്കിയത് യുപിഐയുടെ സൗജന്യ സേവനങ്ങളായിരുന്നു.എന്നാൽ ഇടപാടുകൾക്ക് ഫീസ് ചുമത്തുന്നതോടെ ആളുകൾ വീണ്ടും പണമിടപാടുകളിലേക്ക് തിരികെ പോകാൻ സാധ്യതയുണ്ടെന്ന് വിദഗ്ദ്ധർ ഭയപ്പെടുന്നു. മോദി സർക്കാർ വിദേശ താല്പര്യങ്ങൾക്ക് മുൻഗണന നൽകി സ്വന്തം നാട്ടിലെ ജനങ്ങളെ ബുദ്ധിമുട്ടിക്കുകയാണെന്ന് രാഹുൽ ഗാന്ധി തൻ്റെ പ്രസ്താവനയിലൂടെ വ്യക്തമാക്കി.
