ചാണകമുപയോഗിച്ച് കാൻസറിനുള്ള മരുന്നെന്ന് പ്രചാരണം; മധ്യപ്രദേശിൽ നടന്നത് കോടികളുടെ ക്രമക്കേട്
പശുവിന്റെ ചാണകവും മൂത്രവും ഉപയോഗിച്ച് കാൻസർ മരുന്ന് വികസിപ്പിക്കുമെന്ന് അവകാശപ്പെട്ട് സർക്കാർ ഫണ്ട് ഉപയോഗിച്ച് മധ്യപ്രദേശിൽ നടത്തിയ പത്ത് വർഷം നീണ്ട ഗവേഷണം ഗുരുതര സാമ്പത്തിക വിവാദത്തിലേക്ക് വഴിമാറി. ജബൽപൂരിലെ നാനാജി ദേശ്മുഖ് വെറ്ററിനറി സയൻസ് സർവകലാശാലയിൽ നടന്ന പദ്ധതിയിൽ കോടികളുടെ ക്രമക്കേട് നടന്നുവെന്ന ആരോപണമാണ് ഉയർന്നിരിക്കുന്നത്.
സംഭവത്തിൽ ഡിവിഷണൽ കമ്മീഷണർ അഡീഷണൽ കളക്ടറുടെ നേതൃത്വത്തിലുള്ള പ്രത്യേക അന്വേഷണ സംഘത്തെ നിയോഗിച്ചു. 2011ൽ ആരംഭിച്ച പദ്ധതിയുടെ ലക്ഷ്യം കാൻസർ ഉൾപ്പെടെയുള്ള മാരക രോഗങ്ങൾക്ക് പശുവിന്റെ ഉൽപ്പന്നങ്ങളായ പഞ്ചഗവ്യം ഉപയോഗിച്ച് മരുന്ന് കണ്ടെത്തുകയായിരുന്നു. പദ്ധതിക്കായി സർവകലാശാല എട്ട് കോടി രൂപ ആവശ്യപ്പെട്ടിരുന്നെങ്കിലും സർക്കാർ 3.5 കോടി രൂപ അനുവദിച്ചിരുന്നു.
ഒരു ദശാബ്ദം പിന്നിട്ടിട്ടും ഗവേഷണത്തിൽ നിന്നു നിർണായകമായ ഫലങ്ങളൊന്നും ലഭിച്ചില്ലെന്നതിനൊപ്പം അനുവദിച്ച തുക വിനിയോഗിച്ചതിൽ വലിയ ദുരൂഹതയുണ്ടെന്നുമാണ് പരാതികൾ. അന്വേഷണ സംഘം കളക്ടർക്ക് സമർപ്പിച്ച റിപ്പോർട്ടിൽ ഗവേഷണവുമായി യാതൊരു ബന്ധവുമില്ലാത്ത വസ്തുക്കൾ വരെ ചെലവ് പട്ടികയിൽ ഉൾപ്പെടുത്തിയതായി വ്യക്തമാക്കുന്നു. ഉപകരണങ്ങൾ വാങ്ങിയതിലും ദൈനംദിന ചെലവുകളിലും കൃത്രിമം നടന്നതായും റിപ്പോർട്ട് ചൂണ്ടിക്കാട്ടുന്നു.
ശാസ്ത്രീയ നേട്ടങ്ങളെക്കാൾ പണം ദുരുപയോഗം ചെയ്യാനായിരുന്നു ശ്രമമെന്നതാണ് പ്രാഥമിക നിഗമനം. പദ്ധതിയുമായി ബന്ധപ്പെട്ട ഉദ്യോഗസ്ഥരെയും ഗവേഷകരെയും വിശദമായി ചോദ്യം ചെയ്യുമെന്ന് അന്വേഷണ സംഘം അറിയിച്ചു. ശാസ്ത്രീയ അടിത്തറയില്ലാത്ത അവകാശവാദങ്ങൾ ഉന്നയിച്ച് സർക്കാർ ഖജനാവ് കൊള്ളയടിക്കാൻ ശ്രമിച്ചോയെന്നതാണ് അന്വേഷണത്തിന്റെ പ്രധാന കേന്ദ്രീകരണം. റിപ്പോർട്ട് പുറത്തുവന്നതോടെ സംഭവം വലിയ രാഷ്ട്രീയ വിവാദമായിട്ടുണ്ട്.
