കാബൂളിലെ സ്കൂളിൽ ചാവേർ സ്ഫോടനം; താലിബാൻ നേതാവ് ഷെയ്ഖ് റഹീമുള്ള ഹഖാനി കൊല്ലപ്പെട്ടു
വ്യാഴാഴ്ച അഫ്ഗാൻ തലസ്ഥാനത്തെ ഒരു ജില്ലയിലെ ഒരു സ്കൂളിലുണ്ടായ സ്ഫോടനത്തിൽ താലിബാൻ നേതാക്കളിൽ പ്രമുഖനായ ഒരാളായ ഷെയ്ഖ് റഹീമുള്ള ഹഖാനി കൊല്ലപ്പെട്ടു. ഇസ്ലാമിക് എമിറേറ്റിന്റെ ഡെപ്യൂട്ടി വക്താവ് ബിലാൽ കരിമി അദ്ദേഹത്തിന്റെ മരണം സ്ഥിരീകരിച്ചതായി അന്താരാഷ്ട്ര മാധ്യമമായ ടോളോ ന്യൂസ് റിപ്പോർട്ട് ചെയ്തു.
അഫ്ഗാൻ തലസ്ഥാനത്തെ ഒരു മതപഠനകേന്ദ്രത്തിൽ നേരത്തെ കാൽ നഷ്ടപ്പെട്ട ഒരാൾ പ്ലാസ്റ്റിക് കൃത്രിമ കാലിൽ ഒളിപ്പിച്ച സ്ഫോടകവസ്തുക്കൾ പൊട്ടിച്ചാണ് ആക്രമണം നടത്തിയത്. അതേസമയം സ്ഫോടനത്തിന് പിന്നിൽ ആരാണെന്ന് വ്യക്തമായിട്ടില്ല.
ഷെയ്ഖ് ഹഖാനി അഫ്ഗാനിസ്ഥാനിലെ താലിബാൻ സർക്കാരിന്റെ പിന്തുണക്കാരനും അഫ്ഗാനിസ്ഥാനിൽ പ്രവർത്തിക്കുകയും താലിബാന്റെ ഭരണത്തെ എതിർക്കുകയും ചെയ്യുന്ന ഐഎസിന്റെ പ്രാദേശിക അഫിലിയേറ്റ് ആയ ഇസ്ലാമിക് സ്റ്റേറ്റ് കൊഹ്റസാൻ പ്രൊവിൻസ് (ഐഎസ്-കെ) എന്ന ജിഹാദിസ്റ്റ് തീവ്രവാദ ഗ്രൂപ്പിന്റെ പ്രമുഖ വിമർശകനുമായിരുന്നു.
കഴിഞ്ഞ വർഷം താലിബാൻ അധികാരത്തിൽ തിരിച്ചെത്തിയതിന് ശേഷം രാജ്യത്ത് കൊല്ലപ്പെട്ട ഏറ്റവും ഉയർന്ന വ്യക്തികളിൽ ഒരാളാണ് അദ്ദേഹം. “ഇത് ഇസ്ലാമിക് എമിറേറ്റ് ഓഫ് അഫ്ഗാനിസ്ഥാന് വളരെ വലിയ നഷ്ടമാണ്,” ഒരു മുതിർന്ന താലിബാൻ ഉദ്യോഗസ്ഥൻ റോയിട്ടേഴ്സ് വാർത്താ ഏജൻസിയോട് പറഞ്ഞു, ആക്രമണത്തിന് പിന്നിൽ ആരാണെന്ന് അധികൃതർ അന്വേഷിക്കുകയാണെന്നും അദ്ദേഹം കൂട്ടിച്ചേർത്തു.