വീണ ജോര്ജിനെതിരെ സിപിഐ
ആരോഗ്യമന്ത്രി വീണ ജോര്ജിനെതിരെ രൂക്ഷ വിമര്ശനവുമായി സിപിഐ പത്തനംതിട്ട ജില്ലാ സമ്മേളനം. ഇടതുപക്ഷ മുന്നണിക്ക് ചേരുന്നതല്ല മന്ത്രി വീണ ജോര്ജിന്റെ പ്രവർത്തനങ്ങളും പെരുമാറ്റവുമെന്നാണ് സമ്മേളനത്തിൽ പ്രതിനിധികൾ വിമർശിച്ചത്. ആരോഗ്യവകുപ്പിനെ നിയന്ത്രിക്കാൻ മന്ത്രിക്ക് കഴിയുന്നില്ല. മുൻ മന്ത്രി കെ.കെ. ശൈലജയുടെ കാലത്തെ നല്ല പേരും പ്രവര്ത്തനങ്ങളിലെ മികവും രണ്ടാം ഇടത് സര്ക്കാരിൽ വീണ ജോർജ് ഇല്ലാതാക്കി എന്നും പ്രതിനിധികൾ പറഞ്ഞു.
അതേസമയം തിരുവല്ല താലൂക്ക് ആശുപത്രിയിലെ സൂപ്രണ്ട് ഡോ. അജയമോഹനെ സ്ഥലം മാറ്റിയ വിഷയത്തിൽ കെജിഎംഒഎ ആരോഗ്യമന്ത്രി വീണാ ജോർജിനെതിരെ രംഗത്ത് വന്നു. ആശുപത്രി സൂപ്രണ്ടിനെതിരെ ഉണ്ടായത് വ്യക്തിഹത്യയാണെന്നും സ്ഥലം മാറ്റിയ നടപടിക്കെതിരെ തിങ്കളാഴ്ച തിരുവല്ലയിൽ കരിദിനം ആചരിക്കുമെന്നും കെജിഎംഒഎ അറിയിച്ചു.
ഇന്നലെ രാവിലെ തിരുവല്ല താലൂക്ക് ആശുപത്രിയിൽ മന്ത്രി വീണാ ജോർജ് മിന്നൽ സന്ദർശനം നടത്തിയിരുന്നു. വീഴ്ച കണ്ടെത്തിയതിനെ തുടർന്ന് ആശുപത്രി സൂപ്രണ്ട് ഡോ. അജയമോഹനെ ചെങ്ങന്നൂർ താലൂക്ക് ആശുപത്രി ഡെപ്യൂട്ടി സൂപ്രണ്ടായി സ്ഥലം മാറ്റിയിരുന്നു. മന്ത്രി എത്തുമ്പോൾ 4 ഒപികളിൽ രണ്ടെണ്ണത്തിൽ ഡോക്ടർമാരില്ലായിരുന്നു. ഹാജർ ബുക്കിൽ ഒപ്പിട്ട ഡോക്ടർമാരിൽ പകുതി പേർ പോലും ആശുപത്രിയിലുണ്ടായിരുന്നില്ല