11 ആദിവാസി സ്ത്രീകളെ കൂട്ടബലാത്സംഗം ചെയ്ത കേസിൽ 13 ആന്ധ്രാ പോലീസുകാരെ വെറുതെവിട്ടു; മുഖത്ത് അടിയെന്ന് ഇരകൾ
2007 ഓഗസ്റ്റ് 20 ന്, മാവോയിസ്റ്റ് വിരുദ്ധ സ്പെഷ്യൽ ബ്രാഞ്ച് പോലീസ് സംഘം ഗ്രാമത്തിൽ ഒരു മിന്നൽ പരിശോധനക്കിടെ 11 ആദിവാസി സ്ത്രീകളെ കൂട്ടബലാത്സംഗം ചെയ്ത കേസിൽ 13 ആന്ധ്രാ പോലീസുകാരെ വെറുതെവിട്ടു. എസ്‌സി, എസ്ടി പ്രിവൻഷൻ ഓഫ് അട്രോസിറ്റി ആക്‌ട്, പതിനൊന്നാം അഡീഷണൽ ഡിസ്ട്രിക്ട് ആൻഡ് സെഷൻസ് ജഡ്ജിയുടെ പ്രത്യേക കോടതിയാണ് പൊലീസുകാരെ കുറ്റവിമുക്തരാക്കിയത്.
കുറ്റവിമുക്തനാക്കിയത് ഞങ്ങളുടെ മുഖത്തേറ്റ അടിയാണ്. ഒരു പോലീസുകാരൻ ഒരിക്കലും മറ്റൊരു പോലീസുകാരന്റെ കുറ്റകൃത്യം അന്വേഷിക്കില്ല. നീതി നമ്മെ വിട്ടകന്നു. ഞങ്ങൾക്ക് നഷ്ടപരിഹാരം നൽകാനുള്ള കോടതിയുടെ ഉത്തരവ് മാത്രമാണ് വെള്ളിവെളിച്ചം, അതായത് ഞങ്ങൾ ഇരകളാണെന്ന് കോടതി വിശ്വസിക്കുന്നു- ഇര മാധ്യമങ്ങളോട് പറഞ്ഞു
സംഭവത്തിന് ശേഷം, ഞങ്ങളുടെ ഭർത്താക്കന്മാരും ഗ്രാമത്തിലെ മുതിർന്നവരും ഞങ്ങളെ ക്രൂരവും മനുഷ്യത്വരഹിതവുമായ പെരുമാറ്റത്തിന് വിധേയരാക്കി. ഞങ്ങൾ ബഹിഷ്‌കരിക്കപ്പെടുകയും കുടുംബത്തിൽ നിന്ന് കുറച്ച് ദിവസത്തേക്ക് മാറിനിൽക്കാൻ നിർബന്ധിതരാവുകയും ചെയ്തു. കുട്ടികളുമായി പോലും ഇടപഴകാൻ ഞങ്ങളെ അനുവദിച്ചില്ല. കുറേ ദിവസങ്ങൾക്ക് ശേഷം ഞങ്ങളെ വീടുകളിലേക്ക് തിരികെ വരാൻ അനുവദിച്ചു- മറ്റൊരു സ്ത്രീ പറഞ്ഞു.
11 സ്ത്രീകൾക്ക് വേണ്ടി നിയമപോരാട്ടം നടത്തിയ സ്പെഷ്യൽ പബ്ലിക് പ്രോസിക്യൂട്ടർ സുങ്കര രാജേന്ദ്ര പ്രസാദ് പറഞ്ഞതനുസരിച്ച്, എഫ്‌ഐആർ രജിസ്റ്റർ ചെയ്ത നിമിഷം മുതൽ അന്വേഷണത്തിൽ വിട്ടുവീഴ്ചയുണ്ടായെന്ന് കോടതി നിരീക്ഷിച്ചു. 2007 ആഗസ്റ്റ് 20-ന് പുലർച്ചെ തങ്ങൾ ബലാത്സംഗത്തിനിരയായി എന്ന് സ്ത്രീകൾ പരാതിപ്പെട്ടപ്പോൾ, ഓഗസ്റ്റ് 26 വരെ എഫ്‌ഐആർ രജിസ്റ്റർ ചെയ്തിരുന്നില്ല. കുറ്റകൃത്യം നടന്ന സ്ഥലം സുരക്ഷിതമാക്കാനോ അവരുടെ മൊഴി രേഖപ്പെടുത്താനോ ഒരു പോലീസുകാരനും ഗ്രാമം സന്ദർശിച്ചില്ല. 12 വർഷമായി പ്രതികളുടെ തിരിച്ചറിയൽ പരിശോധന നടത്തിയിട്ടില്ലെന്നും കോടതി ചൂണ്ടിക്കാട്ടി.
എന്നാൽ പോലീസുകാരെ കുടുക്കാനും തുടർനടപടികൾ തടയാനുമുള്ള “മാവോയിസ്റ്റ് ഗൂഢാലോചന” എന്നാണ് സ്ത്രീകളുടെ ആരോപണങ്ങളെ പ്രതികൾക്കുവേണ്ടി ഹാജരായ അഡ്വക്കേറ്റ് ഹരീഷ് വർമ്മ വിശേഷിപ്പിച്ചത്. സ്ത്രീകൾ ബലാത്സംഗം ചെയ്യപ്പെട്ടുവെന്ന ആരോപണത്തെ പിന്തുണയ്ക്കുന്ന ഒരു തെളിവ് പോലും ഉണ്ടായിരുന്നില്ല. സ്ത്രീകളുടെ മൊഴിയല്ലാതെ മറ്റൊന്നും ഹാജരാക്കാൻ സ്പെഷ്യൽ പബ്ലിക് പ്രോസിക്യൂട്ടർക്ക് കഴിഞ്ഞില്ല എന്നും അദ്ദേഹം പറഞ്ഞു.
