പ്രാര്ത്ഥനയോടെ ടെലിവിഷന് മുന്നിൽ കേരളം: ദേവനന്ദയെ കാണാതായിട്ട് മണിക്കൂറുകള് പിന്നിട്ടു
കൊല്ലം നെടുമണ്കാവ് ഇളവൂരില് കാണാതായ ആറുവയസ്സുകാരിയെ കണ്ടെത്താനുളള തിരച്ചില് മണിക്കൂറുകള് പിന്നിട്ടിട്ടും കുട്ടിയെക്കുറിച്ച് യാതൊരു വിവരവുമില്ല. കുട്ടി പുഴയില് വീണതാകാമെന്ന സംശയത്തില് അഗ്നിരക്ഷാ സേനയും മുങ്ങല് വിദഗ്ധരും സമീപത്തെ പുഴയില് തിരിച്ചിൽ നടത്തുന്നുണ്ടെങ്കിലും ഇതുവരെ യാതൊരു ഒരു സൂചനയും ലഭിച്ചിട്ടില്ല.
ഇന്നലെ രാവിലെ 10.15 ഓടെയാണ് ഇളവൂരിലെ പ്രദീപ്-ധന്യ ദമ്പതിമാരുടെ മകള് ദേവനന്ദയെ വീടിന് മുന്നില് കളിച്ചുകൊണ്ടിരിക്കെ കാണാതായത്. സംഭവസമയം കുട്ടിയുടെ അമ്മ മാത്രമാണ് വീട്ടിലുണ്ടായിരുന്നത്. വീടിന് പുറകില് തുണി അലക്കുകയായിരുന്ന ഇവര് കുറച്ചുസമയത്തേക്ക് മകളുടെ ശബ്ദമൊന്നും കേള്ക്കാതായതോടെയാണ് അവർ തുണികഴുകൽ മതിയാക്കി വീടിൻ്റെ മുന്വശത്ത് എത്തിയത്. ഈ സമയം വീടിന്റെ വാതില് തുറന്നുകിടക്കുന്ന നിലയിലുമായിരുന്നു. തുടര്ന്ന് വീടിനകത്തെല്ലാം പരിശോധിച്ചെങ്കിലും മകളെ കാണാത്തതിനാൽ ധന്യ ബഹളംവെച്ച് നാട്ടുകാരെ വിവരമറിയിക്കുകയായിരുന്നു. .
കുട്ടിയെ കാണാനില്ലെന്ന വിവരമറിഞ്ഞതോടെ പൊലീസും നാട്ടുകാരും പ്രദേശത്ത് വിശദമായ അന്വേഷണം നടത്തി. വീടിൻ്റെ നൂറുമീറ്റര് അകലെ പുഴയുള്ളതിനാല് കുട്ടി പുഴയില് വീണിരിക്കാമെന്നും സംശയമുയര്ന്നു. ഇതേത്തുടര്ന്ന് അഗ്നിരക്ഷാ സേനയെത്തി പുഴയിലും തിരച്ചില് നടത്തി.
അന്വേഷണം ഊർജ്ജിതമാക്കിയതോടെ പൊലീസ് ഡോഗ് സ്ക്വാഡിനെയും സ്ഥലത്തെത്തിച്ച് തിരച്ചില് നടത്തി. പ്രദീപിന്റെ വീട്ടില്നിന്ന് മണംപിടിച്ച പൊലീസ് നായ പുഴയുടെ കുറുകെയുള്ള ബണ്ട് കടന്ന് വള്ളക്കടവ് വരെ ഓടി തിരിച്ചുമടങ്ങിയിരുന്നു. ഈ ഭാഗത്തും പൊലീസ് വിശദമായ തിരച്ചില് നടത്തിയെങ്കിലും നിരാശയായിരുന്നു ഫലം.