പ്ലസ് വണ്‍ പ്രവേശനത്തിന് സമയം നീട്ടിനല്‍കാനാവില്ലെന്ന് സര്‍ക്കാര്‍
പ്ലസ് വണ്‍ പ്രവേശനത്തിന് കൂടുതല്‍ സമയം അനുവദിക്കാനാകില്ലെന്ന് സര്‍ക്കാര്‍ ഹൈക്കോടതിയെ അറിയിച്ചു. സ്‌റ്റേറ്റ് സിലബസില്‍ പഠിച്ചവര്‍ ഒരു മാസമായി പ്രവേശനത്തിന് കാത്തിരിക്കുകയാണെന്നും സര്‍ക്കാര്‍ കോടതിയെ അറിയിച്ചു. ഇന്ന് ഒന്നരവരെയാണ് പ്രവേശനത്തിന് അപേക്ഷിക്കാനുള്ള സമയപരിധി. ഹര്‍ജി ഹൈക്കോടതി 12 മണിക്ക് പരിഗണിക്കും
പ്ലസ് വണ്‍ പ്രവേശനത്തിനുള്ള സമയം നീട്ടണമെന്ന് ആവശ്യപ്പെട്ട് സിബിഎസ്ഇ വിദ്യാര്‍ഥികള്‍ നല്‍കിയ ഹര്‍ജി കോടതി പരിഗണിക്കുന്നതിനിടെയാണ് സര്‍ക്കാരിന്‍റെ വിശദീകരണം. വിദ്യാഭ്യാസവകുപ്പിന് പ്ലസ് വണ്‍ പ്രവേശനത്തിനുള്ള നടപടി തുടരാനുള്ള അനുമതി കൊടുക്കണമെന്നും സര്‍ക്കാര്‍ ആവശ്യപ്പെട്ടു
ഒരു വര്‍ഷം 200 അധ്യായന ദിവസങ്ങള്‍ വേണമെന്നാണ് ചട്ടം. ഓഗസ്റ്റ് 15ന് ക്ലാസ് തുടങ്ങാനാണ് നിലവില്‍ ആലോചിക്കുന്നത്.
നിശ്ചയിച്ചിരിക്കുന്ന ദിവസം ക്ലാസ് ആരംഭിച്ചാല്‍ പോലും ശനിയാഴ്ചകളിലും ക്ലാസ് നടത്തിയാലെ അധ്യായന വര്‍ഷം പൂര്‍ത്തിയാക്കാന്‍ സാധിക്കൂ. സമയം നീട്ടി നല്‍കുന്നത് അലോട്ട്‌മെന്‍റ് അടക്കമുള്ള കാര്യങ്ങളെ ബാധിക്കുമെന്നും സര്‍ക്കാര്‍ കോടതിയെ ബോധിപ്പിച്ചു
