പ്രവാചക നിന്ദാ പരാമർശം അറബ് രാജ്യങ്ങളുമായുള്ള ഇന്ത്യയുടെ ബന്ധത്തെ ബാധിക്കില്ല; രാജ്യസഭയിൽ വി മുരളീധരൻ

ബിജെപി മുൻ ദേശീയ വക്താവ് പ്രവാചകൻ മുഹമ്മദ് നബിക്കെതിരെ നടത്തിയ വിവാദ പരാമർശങ്ങൾ അറബ് രാജ്യങ്ങളുമായുള്ള ഇന്ത്യയുടെ സൗഹൃദ ബന്ധത്തെ ബാധിച്ചിട്ടില്ലെന്ന് കേന്ദ്ര സർക്കാർ രാജ്യസഭയെ അറിയിച്ചു. അറബ് ലോകവുമായുള്ള ബന്ധം കൂടുതൽ ശക്തിപ്പെടുത്തുന്നതിന് ഇന്ത്യ ഉയർന്ന മുൻഗണന നൽകുന്നത് തുടരുകയാണെന്നും ഈ വിഷയത്തിൽ ന്യൂഡൽഹിയുടെ വീക്ഷണവും കാഴ്ചപ്പാടുകളും മനസ്സിലാക്കുന്നുണ്ടെന്നും വിദേശകാര്യ സഹമന്ത്രി വി മുരളീധരൻ പറഞ്ഞു.

ഇന്ത്യയിലെ രാഷ്ട്രീയ പാർട്ടികളുടെ വക്താക്കൾ നടത്തുന്ന വിദ്വേഷ പ്രസംഗങ്ങളും അപകീർത്തികരമായ പരാമർശങ്ങളും അറബ് രാജ്യങ്ങളുമായുള്ള ബന്ധത്തെയും പ്രവാചകനെതിരായ പ്രസ്താവനയോടുള്ള സർക്കാരിന്റെ പ്രതികരണത്തെയും ബാധിച്ചിട്ടുണ്ടോ എന്ന ചോദ്യങ്ങളോട് പ്രതികരിക്കുകയായിരുന്നു അദ്ദേഹം.

“ഇല്ല. രാഷ്ട്രീയം, വ്യാപാരം, നിക്ഷേപം, പ്രതിരോധം, സുരക്ഷ, ശാസ്ത്രം, സാങ്കേതികവിദ്യ, സംസ്കാരം, ജനങ്ങൾ തമ്മിലുള്ള ബന്ധം എന്നിവയുൾപ്പെടെ വിവിധ മേഖലകളിൽ കഴിഞ്ഞ കുറച്ച് വർഷങ്ങളായി ഗണ്യമായി ശക്തിപ്പെട്ട അറബ് രാജ്യങ്ങളുമായി ഇന്ത്യ ചരിത്രപരവും സൗഹൃദപരവുമായ ബന്ധം പങ്കിടുന്നു.” മുരളീധരൻ മറുപടിയായി പറഞ്ഞു.

പ്രവാചകനെതിരെ അപകീർത്തികരമായ പരാമർശം നടത്തിയെന്നാരോപിച്ച് കഴിഞ്ഞ മാസം ബിജെപി ദേശീയ വക്താവ് നൂപുർ ശർമയെ സസ്‌പെൻഡ് ചെയ്യുകയും ഡൽഹി യൂണിറ്റ് മീഡിയ ഹെഡ് നവീൻ ജിൻഡാലിനെ പാർട്ടിയിൽ നിന്ന് പുറത്താക്കുകയും ചെയ്തിരുന്നു.

പ്രവാചകനെക്കുറിച്ചുള്ള പരാമർശവുമായി ബന്ധപ്പെട്ട് ഖത്തർ, കുവൈറ്റ്, പാകിസ്ഥാൻ, ഇറാൻ, ഇന്തോനേഷ്യ, മലേഷ്യ, അസർബൈജാൻ എന്നീ രാജ്യങ്ങൾ ഇന്ത്യൻ അംബാസഡർമാരെ വിളിച്ചുവരുത്തിയതായി മറ്റൊരു ചോദ്യത്തിന് മുരളീധരൻ മറുപടിയായി പറഞ്ഞു.

“ഞങ്ങളുടെ അംബാസഡർമാർ പ്രസ്താവനകൾ നടത്തിയത് വ്യക്തികളാണെന്നും ഇന്ത്യൻ സർക്കാരിന്റെ വീക്ഷണത്തെ ഒരു തരത്തിലും പ്രതിഫലിപ്പിക്കുന്നതല്ലെന്നും അറിയിച്ചു. നമ്മുടെ നാഗരിക പൈതൃകത്തിനും സാംസ്കാരിക പാരമ്പര്യത്തിനും അനുസൃതമായി, ഇന്ത്യ എല്ലാ മതങ്ങളോടും ഉയർന്ന ബഹുമാനം നൽകുന്നു എന്ന് അറിയിക്കുകയും ചെയ്തതായി'” മുരളീധരൻ പറഞ്ഞു.