ചിത്രീകരണത്തിനായി ലൊക്കേഷനുകളിൽ സമയത്ത് എത്തുന്നില്ല; ശ്രീനാഥ് ഭാസിക്കെതിരെ അച്ചടക്ക നടപടിക്ക് ഫിലിം ചേമ്പര്
മലയാള സിനിമയിലെ യുവ നടന് ശ്രീനാഥ് ഭാസിക്കെതിരെ ഫിലിം ചേമ്പര് അച്ചടക്ക നടപടി സ്വീകരിക്കാൻ സാധ്യത. ശ്രീനാഥ് അഭിനയിക്കുന്ന സിനിമകളുടെ ലൊക്കേഷനുകളിൽ ചിത്രീകരണത്തിനായി സമയത്ത് എത്തുന്നില്ലെന്നും നിര്മ്മാതാക്കള്ക്ക് വലിയ നഷ്ടം ഉണ്ടാകുന്നുവെന്നും കണ്ടെത്തിയതിനെത്തുടര്ന്നാണ് നടപടിയെടുക്കാന് ഫിലിം ചേമ്പര് ആലോചിക്കുന്നത് എന്നാണ് റിപ്പോർട്ടുകൾ.
ഇന്ന് ചേര്ന്ന ഫിലിം ചേമ്പര് യോഗത്തിലാണ് നടപടിയുമായി മുന്നോട്ട് പോകാന് തീരുമാനമെടുത്തത് . വിഷയത്തിൽ അടുത്തദിവസം ശ്രീനാഥ് ഭാസി ചേമ്പറില് പോയി കാര്യങ്ങള് ബോധ്യപ്പെടുത്തണം. ശ്രീനാഥിന് അമ്മയിൽ മെമ്പര്ഷിപ്പ് ഇല്ലാത്തതിനാലാണ് നടപടിക്ക് ഫിലിം ചേമ്പര് മുന്കൈയെടുക്കുന്നത്. ശ്രീനാഥ് ഭാസി ഇനി ഏറ്റെടുക്കുന്ന പ്രോജക്ടുകള്ക്ക് അനുമതി നല്കുമ്പോള് ചേമ്പറുമായി ആലോചിക്കണമെന്നും നിര്ദ്ദേശമുണ്ട്.
ഇതോടൊപ്പം തന്നെ നടന്മാര് ചില പ്രൊഡക്ഷന് എക്സിക്യൂട്ടീവുമാരെ മാനേജര് ആക്കുന്നത് ഇനി അനുവദിക്കില്ലെന്നും ചേമ്പറിന്റെ യോഗത്തില് തീരുമാനമെടുത്തു. അഭിനേതാക്കളുടെ ശമ്പളം കുറയ്ക്കുന്ന കാര്യത്തില് അടുത്ത മാസം വീണ്ടും യോഗം ചേര്ന്ന് തീരുമാനമെടുക്കും