ബൈഡൻ തെരഞ്ഞെടുപ്പ് ജയിച്ചാല്‍ അമേരിക്കയുടെ നിയന്ത്രണം ചൈനയുടെ കൈകളില്‍ എത്തും: ഡോണൾഡ് ട്രംപ്
വരാനിരിക്കുന്ന തെരഞ്ഞെടുപ്പിൽ തെരഞ്ഞെടുപ്പിൽ ഡെമോക്രാറ്റിക് പ്രസിഡന്റ് സ്ഥാനാർത്ഥി ബൈഡൻ വിജയിച്ചാൽ അമേരിക്കയുടെ നിയന്ത്രണം പൂർണമായും ചൈനയുടെ കൈകളിൽ എത്തുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ്.
ഇതിന് കാരണമായി ട്രംപ് പറയുന്നത് ബൈഡൻ ഇതുവരെ ചൈനയെ വിമർശിച്ച് ഒരു പരാമർശം പോലും നടത്തിയിട്ടില്ല എന്നതാണ്. അദ്ദേഹം ഇനി അത് നടത്തുമെന്നും തോന്നുന്നില്ല. ബൈഡന്‍ അമേരിക്കന്‍ പ്രസിഡന്റ് തെരഞ്ഞെടുപ്പ് വിജയിക്കണമെന്ന് ചൈന വളരെയധികം ആഗ്രഹിക്കുന്നുണ്ട്. ഇതുമായി ബന്ധപ്പെട്ട് രഹസ്യാന്വേഷണ വിഭാഗത്തിന്‍റെ റിപ്പോര്‍ട്ടുണ്ടെന്നും ട്രംപ് പറയുകയുണ്ടായി.
ഇന്ന് ‘2020 കൌണ്‍സില്‍ ഫോര്‍ നാഷണല്‍’ പാര്‍ട്ടി യോഗത്തെ അഭിസംബോധന ചെയ്യവേ ആയിരുന്നു ട്രംപിന്റെ പ്രസ്താവന. തെരഞ്ഞെടുപ്പ് ഫലം വരുമ്പോള്‍ ഡമോക്രാറ്റിക്ക് പാര്‍ട്ടിയുടെ ദാര്‍ഷ്ട്യവും വിദ്വേഷവും ഇത്തവണ പൂര്‍ണ്ണമായും തിരസ്കരിക്കപ്പെടണം. അമേരിക്കന്‍ ജനതയുടെ ജീവിതകാലത്തിലെ ഏറ്റവും വലിയ തെരഞ്ഞെടുപ്പാണ് ഇത്തവണ വരാന്‍ പോകുന്നത്.
ലോകത്തിന്റെ മുന്നില്‍ അമേരിക്കയെ താഴ്ത്തിക്കെട്ടാന്‍ ശ്രമിക്കുന്ന ഒരു പാര്‍ട്ടിക്ക് രാജ്യത്തെ നയിക്കാന്‍ സാധിക്കില്ല. പക്ഷെ ബെഡന്‍റെ കഴിഞ്ഞ ദിവസത്തെ പ്രസംഗത്തിലെ പ്രധാന കാര്യം അദ്ദേഹം ക്രമസമാധാനത്തെക്കുറിച്ച് പറഞ്ഞില്ല എന്നതാണ്. യുഎസില്‍ ഡെമോക്രാറ്റുകള്‍ ഭരിക്കുന്ന നഗരങ്ങളില്‍ തീര്‍ത്തും നിയന്ത്രണം നഷ്ടപ്പെട്ടത് സംബന്ധിച്ച അദ്ദേഹം ഒന്നും പറഞ്ഞില്ല എന്നും ട്രംപ് കുറ്റപ്പെടുത്തി.
