തിരുവനന്തപുരം വിമാനതാവള കൈമാറ്റം; കേന്ദ്രതീരുമാനത്തിനെതിരെ നിയമസഭയില് പ്രമേയം പാസാക്കാന് സംസ്ഥാന സര്ക്കാര്
തിരുവനന്തപുരം അന്താരാഷ്ട്ര വിമാനത്താവളത്തിന്റെ നടത്തിപ്പും മേല്നോട്ടവും അദാനി എന്റര്പ്രൈസസിനെ ഏല്പ്പിക്കാന് കേന്ദ്രമന്ത്രിസഭ എടുത്ത തീരുമാനം പിന്വലിക്കണമെന്ന് സര്വകക്ഷി യോഗം ആവശ്യപ്പെട്ടു.
സർക്കാർ വിളിച്ചുചേർത്ത ഇന്ന് നടന്ന സര്വ്വകക്ഷിയോഗത്തില് ബിജെപി ഒഴികെ എല്ലാ കക്ഷികളും വിമാനത്താവള സ്വകാര്യവല്ക്കരണത്തെ എതിര്ത്തു. നിയമ നടപടികള് തുടരുന്നതിനൊപ്പം ഒറ്റക്കെട്ടായി ഈ വിഷയത്തില് മുന്നോട്ടുപോകാന് യോഗം തീരുമാനിച്ചതായി മുഖ്യമന്ത്രി അറിയിച്ചു.
തിരുവനന്തപുരം എയര്പോര്ട്ടിന്റെ മേല്നോട്ടവും നടത്തിപ്പും സംസ്ഥാന സര്ക്കാരിന് മുഖ്യപങ്കാളിത്തമുള്ള സ്പെഷ്യല് പര്പ്പസ് വെഹിക്കിളില് നിക്ഷിപ്തമാക്കണം എന്നാണ് സംസ്ഥാന സര്ക്കാര് ആവശ്യപ്പെട്ടതെന്നു യോഗത്തില് വ്യക്തമാക്കി. കേന്ദ്ര വ്യോമയാന മന്ത്രിക്ക് രണ്ടു തവണയും പ്രധാനമന്ത്രിക്ക് മൂന്നുവട്ടവും ഈ ആവശ്യമുന്നയിച്ച് കത്ത് എഴുതിയിട്ടുണ്ട്.
സംസ്ഥാന ചീഫ് സെക്രട്ടറി, കേന്ദ്ര വ്യോമയാന സെക്രട്ടറിക്ക് കാര്യങ്ങള് വിശദീകരിച്ച് എഴുതിയ കത്തില് കേരള സ്റ്റേറ്റ് ഇന്ഡസ്ട്രിയല് ഡെവലപ്മെന്റ് കോര്പ്പറേഷന് സംസ്ഥാന സര്ക്കാരിനുവേണ്ടി ബിഡില് പങ്കെടുത്തുവെന്നും ഈ ഓഫര് ന്യായമായത് ആയിരുന്നുവെന്നും പറഞ്ഞിരുന്നു. അദാനി എന്റര്പ്രൈസസ് കൂടുതല് തുക ക്വാട്ട് ചെയ്തതിനാല് അതേ തുക ഓഫര് ചെയ്യാന് സംസ്ഥാന സര്ക്കാര് തയ്യാറാണ് എന്നും അറിയിച്ചു.
2003ല് കേന്ദ്ര വ്യോമയാന മന്ത്രാലയം സംസ്ഥാന സര്ക്കാരിന് നല്കിയ ഉറപ്പില്, സംസ്ഥാന സര്ക്കാര് വിമാനത്താവള വികസനത്തിനായി നല്കിയ സംഭാവനകള് പരിഗണിച്ച് വിമാനത്താവളത്തിന്റെ മേല്നോട്ടവും നടത്തിപ്പും സംസ്ഥാന സര്ക്കാരിന്റെ സ്പെഷ്യല് പര്പ്പസ് വെഹിക്കിളിന് നല്കാമെന്ന് പറഞ്ഞിരുന്നു.