ആഭ്യന്തരസുരക്ഷ: മുഖ്യമന്ത്രിമാരുടെ യോഗത്തില് മമത പങ്കെടുക്കുന്നില്ല
ആഭ്യന്തര സുരക്ഷയുമായി ബന്ധപ്പെട്ട് കേന്ദ്ര ആഭ്യന്തരമന്ത്രാലയം വിളിച്ചുകൂട്ടിയ മുഖ്യമന്ത്രിമാരുടെ യോഗം ഇന്ന് ഡല്ഹിയില് നടക്കും. രാജ്യത്ത് തീവ്രവാദവിരുദ്ധ നടപടി ശക്തിപ്പെടുത്തല്, രഹസ്യാന്വേഷണ സംവിധാനം മെച്ചപ്പെടുത്തല്, മാവോവാദിപ്രശ്നം, പോലീസ് സേന പരിഷ്കരണം, തീരദേശ സുരക്ഷ, കേന്ദ്ര-സംസ്ഥാന ബന്ധങ്ങള് തുടങ്ങിയവ യോഗത്തില് ചര്ച്ചാവിഷയമാകും.
മന്മോഹന്സിംങ് ഉദ്ഘാടനം ചെയ്യുന്ന യോഗത്തില് പശ്ചിമബംഗാള് മുഖ്യമന്ത്രിയായ മമതാ ബാനര്ജി പങ്കെടുക്കില്ല, എങ്കിലും ബംഗാളിനെ പ്രതിനിധാനം ചെയ്ത് ധനമന്ത്രി അമിത് മിത്ര പങ്കെടുക്കും. ഈ യോഗത്തില് പങ്കെടുക്കാത്തതിന് പ്രത്യേക കാരണങ്ങളൊന്നും മമത പറഞ്ഞിട്ടില്ല. ആഭ്യന്തര മന്ത്രി പി.ചിദംബരം യോഗത്തില് ആമുഖ പ്രസംഗം നടത്തും.
മാവോഭീഷണി നിലനില്ക്കുന്ന ഒമ്പത് സംസ്ഥാനങ്ങളിലെ മുഖ്യമന്ത്രിമാര് പങ്കെടുക്കുന്ന പ്രത്യേക ചര്ച്ച ഈ സമ്മേളനത്തിന്റെ ഭാഗമായി നടക്കും. വിവാദമായ ദേശീയഭീകരവിരുദ്ധ കേന്ദ്രരൂപീകരണം ഈ സമ്മേളനത്തില് ചര്ച്ചചെയ്യാനായിരുന്നു ആഭ്യന്തര മന്ത്രാലയം ആദ്യം തീരുമാനിച്ചതെങ്കിലും മമതാ ബാനര്ജിയും തമിഴ്നാട് മുഖ്യമന്ത്രി ജയലളിതയും ഒഡീഷ മുഖ്യമന്ത്രിയായ നവീന് പാട്നായികും ഇതിനെ എതിര്ത്തനതിനെ തുടര്ന്ന് ഈ വിഷയം ചര്ച്ചചെയ്യാന് പ്രത്യേക യോഗം മെയ് അഞ്ചിന് വിളിച്ചുകൂട്ടുമെന്ന് തീരുമാനിച്ചു. ഈ യോഗത്തില് മമത പങ്കെടുക്കും.