ഇടുക്കി ഡിസിസി പ്രസിഡണ്ടിന്റെ മുടി വെട്ടില്ലെന്ന തീരുമാനവുമായി ബാർബർമാരുടെ സംഘടന
ഇടുക്കി ഡിസിസി പ്രസിഡന്റായ സിപി മാത്യുവിന്റെ മുടി വെട്ടില്ലെന്ന തീരുമാനവുമായി ബാർബർമാരുടെ സംഘടന. കഴിഞ്ഞദിവസം വണ്ടിപ്പെരിയാറില്‍ മാലിന്യപ്രശ്‌നവുമായി ബന്ധപ്പെട്ട് കോണ്‍ഗ്രസ് നടത്തിയ സമരത്തിനിടെ സി പി മാത്യു ബാര്‍ബര്‍മാരെ അവഹേളിച്ച് സംസാരിച്ചെന്ന് ആരോപിച്ചാണ് ബാര്‍ബേഴ്‌സ് അസോസിയേഷന്റെ ഈ തീരുമാനം.
‘ഞങ്ങള്‍ ചെരയ്ക്കാന്‍ അല്ല നടക്കുന്നതെന്ന് സിപിഎം ഓര്‍ക്കണം’ എന്നായിരുന്നു പരിപാടിയിൽ മാത്യുവിന്റെ വാക്കുകള്‍. ഈ പരാമർശത്തെ തുടർന്ന് ബാര്‍ബര്‍മാരുടെ സംസ്ഥാന സംഘടനയായ സ്റ്റേറ്റ് ബാര്‍ബേഴ്‌സ് അസോസിയേഷന്‍ രംഗത്തെത്തുകയായിരുന്നു.
തങ്ങളുടെ തൊഴിലിനെ അവഹേളിക്കുന്ന തരത്തിലുള്ളതാണ് മാത്യുവിന്റെ പരാമര്‍ശം എന്നാണ് അസോസിയേഷന്‍ പ്രതികരിച്ചത്. ” ആളുകൾ എല്ലാവരും മുടിവെട്ടാനും താടി വെട്ടാനുമൊക്കെയായി ഞങ്ങളുടെ അടുത്ത് വരും. ഈ തൊഴിലില്‍ ഒരു മാന്യത കുറവും ഞങ്ങള്‍ക്ക് തോന്നിയിട്ടില്ല. മാന്യതയുള്ള പണി തന്നെയാണിത്. തൊഴിലിനെ മോശമായാണ് സി പി മാത്യു ചിത്രീകരിച്ചത്. പ്രതിഷേധം അദ്ദേഹത്തെ അറിയിച്ചെങ്കിലും തിരുത്താന്‍ തയ്യാറായിട്ടില്ല. മാപ്പ് പറയും വരെ അദ്ദേഹത്തെ ബഹിഷ്‌കരിക്കാനാണ് തീരുമാനം.”- സംഘടന നേതാക്കൾ അറിയിച്ചു.
