പമ്പ മണൽകടത്ത് കേസിൽ വിജിലൻസ് അന്വേഷണം നടത്താൻ കോടതി ഉത്തരവ്
പമ്പ മണൽകടത്ത് കേസിൽ വിജിലൻസ് അന്വേഷണം. തിരുവനന്തപുരം വിജിലൻസ് കോടതിയുടേതാണ് ഉത്തരവ്. പ്രതിപക്ഷ നേതാവ് രമേശ് ചെന്നിത്തലയുടെ പരാതിയിലാണ് നടപടി. വിജിലൻസ് അന്വേഷണത്തിന് സർക്കാർ അനുമതി നിഷേധിച്ചതിനെ തുടർന്ന് പ്രതിപക്ഷ നേതാവ് വിജിലൻസ് കോടതിയെ സമീപിക്കുകയായിരുന്നു.
വിജിലൻസ് അന്വേഷണം ആവശ്യപ്പെട്ട് പ്രതിപക്ഷ നേതാവ് നേരത്തെ വിജിലൻസ് ഡയറക്ടർക്ക് കത്ത് നൽകിയിരുന്നു. അന്വേഷണ കാര്യത്തിൽ തീരുമാനമാകാതെ വന്നപ്പോൾ പ്രതിപക്ഷ നേതാവ് നേരിട്ട് വിജിലൻസ് കോടതിയെ സമീപിക്കുകയായിരുന്നു. ഇതിനിടയിലാണ് വിജിലൻസ് ഡയറക്ടർ അന്വേഷണത്തിന് അനുമതി ചോദിച്ച് സർക്കാരിനെ സമീപിക്കുകയും സർക്കാർ അനുമതി നിഷേധിക്കുകയും ചെയ്തത്.
2018 ലെ പ്രളയത്തിൽ പന്പ ത്രിവേണിയിൽ അടിഞ്ഞു കൂടിയ 90,000 ഘനമീറ്റർ മണൽ നിയമം ലംഘിച്ച് നീക്കുന്നതിന് ജില്ലാ കളക്ടർ അനുമതി നൽകി എന്നതാണ് കേസ്.