കേരളത്തില് അതിതീവ്ര മഴയ്ക്ക് സാധ്യത; 4 ജില്ലകളില് റെഡ് അലര്ട്ട്
സംസ്ഥാനത്ത് അതിതീവ്ര മഴയ്ക്ക് സാധ്യതയുള്ളതിനാല് നാല് ജില്ലകളില് റെഡ് അലര്ട്ടും വിവിധ ജില്ലകളില് ഓറഞ്ച് അലര്ട്ടും പ്രഖ്യാപിച്ചു. പത്തനംതിട്ട, കോട്ടയം, വയനാട്, ഇടുക്കി ജില്ലകളിലാണ് ദുരന്തനിവാരണ അതോറിറ്റി റെഡ് അലര്ട്ട് പ്രഖ്യാപിച്ചിരിക്കുന്നത്. റെഡ്, ഓറഞ്ച്, മഞ്ഞ അലേര്ട്ട് പ്രഖ്യാപിക്കപ്പെട്ടിരിക്കുന്ന ജില്ലകളിലെ താഴ്ന്ന പ്രദേശങ്ങള്, നദീതീരങ്ങള്, ഉരുള്പൊട്ടല്-മണ്ണിടിച്ചില് സാധ്യതയുള്ള മലയോര പ്രദേശങ്ങള് തുടങ്ങിയ ഇടങ്ങളിലുള്ളവര് അതീവ ജാഗ്രത പാലിക്കണം. മലയോര മേഖലയിലേക്കുള്ള രാത്രി ഗതാഗതം പൂര്ണ്ണമായി ഒഴിവാക്കണം. വൈകീട്ട് ഏഴ് മുതല് പകല് ഏഴ് വരെയുള്ള സമയത്ത് മലയോര മേഖലയിലേക്കുള്ള രാത്രി ഗതാഗതം നിരോധിക്കണം.
അതിതീവ്ര മഴയുണ്ടാകുമെന്ന മുന്നറിയിപ്പിന്റെ സാഹചര്യത്തില് പൊതുജനങ്ങളോടും സര്ക്കാര് സംവിധാനങ്ങളോടും ഉരുള്പൊട്ടല്, മണ്ണിടിച്ചില്, താഴ്ന്ന പ്രദേശങ്ങളില് വെള്ളപ്പൊക്കം എന്നിവ മുന്നില് കണ്ടുകൊണ്ടുള്ള തയ്യറെടുപ്പുകള് നടത്താനും അതീവ ജാഗ്രത പുലര്ത്താനും നിര്ദേശമുണ്ട്. കോവിഡ് 19 ന്റെ പശ്ചാത്തലത്തില് ദുരിതാശ്വാസ ക്യാമ്പുകള് നടത്താന് സംസ്ഥാന ദുരന്ത നിവാരണ അതോറിറ്റി ഓറഞ്ച് ബുക്ക് 2020 ലൂടെ നിര്ദേശിച്ച തരത്തിലുള്ള തയ്യാറെടുപ്പുകള് പൂര്ത്തീകരിക്കണമെന്നും നിര്ദേശിക്കുന്നു.