നാടിനെയും നാട്ടുകാരെയും കുരുതി കൊടുത്ത് രാഷ്ട്രീയ ലക്ഷ്യങ്ങള് നേടാന് ശ്രമിക്കുന്ന ബിജെപി ‐ യുഡിഎഫ് കൂട്ടുകെട്ടിനെ ജനം തിരിച്ചറിയും: കോടിയേരി
കോവിഡ് ദുരന്തകാലത്തുപോലും നാടിനെയും നാട്ടുകാരെയും കുരുതികൊടുത്തുകൊണ്ട് ഹീനമായ രാഷ്ട്രീയ ലക്ഷ്യങ്ങള് നേടാന് ശ്രമിക്കുന്ന ബിജെപി ‐ യുഡിഎഫ് കൂട്ടുകെട്ടിനെ ജനം തിരിച്ചറിയും എന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. സ്വര്ണ്ണക്കടത്ത് കേസ് ദേശീയ അന്വേഷണ ഏജന്സി ഏറ്റെടുത്തിരിക്കെ വിവാദങ്ങളുടെ പുകമറയുയര്ത്തുന്നവര് യഥാര്ത്ഥ കുറ്റവാളികളെ രക്ഷിക്കാനുള്ള ശ്രമത്തിലാണ് എന്നും അദ്ദേഹം ആരോപിച്ചു.
സ്വര്ണ്ണക്കടത്ത് കേസ് ദേശീയ അന്വേഷണ ഏജന്സിയെ ഏല്പ്പിച്ച കേന്ദ്രസര്ക്കാരിന്റെ തീരുമാനം കേസില് ഏതന്വേഷണവും ആകാമെന്ന സംസ്ഥാന സര്ക്കാരിന്റെ നിലപാടിനെയാണ് അടിവരയിടുന്നത്.സ്വര്ണ്ണക്കടത്തിന്റെ ആസൂത്രകരെയും നടത്തിപ്പുകാരെയും ഗുണഭോക്താക്കളെയും അവരുടെ രക്ഷിതാക്കളെയും ഇതിലൂടെ നിയമത്തിന്റെ മുന്നില് കൊണ്ടുവരണം എന്നും അദ്ദേവും പറഞ്ഞു.
സ്വര്ണ്ണം കൊണ്ടുവന്ന നയതന്ത്ര ബാഗ് വിട്ടുകൊടുക്കാന് ഇടപെട്ടത് സംഘപരിവാര് പ്രവര്ത്തകനായ ഒരു ക്ലിയറിംഗ് ഏജന്റാണ് എന്നത് നിസ്സാരമല്ല എന്ന് പറഞ്ഞ കോടിയേരി, ബാഗ് തടഞ്ഞുവച്ചാല് പണിപോകും എന്ന് ഇയാള് കസ്റ്റംസ് ഉദ്യോഗസ്ഥരെ ഭീക്ഷണിപ്പെടുത്തി. വിട്ടുകൊടുക്കില്ല എന്ന് കണ്ടപ്പോള് ബാഗ് തിരിച്ചയക്കാനും സമ്മര്ദ്ദം ചെലുത്തി എന്നും ഫേസ്ബുക്കിൽ എഴുതി.
ഇതിനുപിന്നാലെയാണ് സ്വര്ണ്ണം കൊണ്ടുവന്നത് നയതന്ത്രബാഗിലല്ല എന്ന വിദേശകാര്യ സഹമന്ത്രി വി മുരളീധരന്റെ പ്രസ്താവന വന്നത്. നയതന്ത്രബാഗ് ക്ലിയര് ചെയ്യാന് ഏജന്റിന്റെ ആവശ്യമില്ല എന്നിട്ടും ബി എം എസ് നേതാവായ ക്ലിയറിംഗ് ഏജന്റ് അതില് ഇടപെട്ടു. സ്വര്ണ്ണക്കടത്ത് കേസിലെ ആസൂത്രകരിലേക്കും ഗൂഢാലോചനകാരിലേക്കും വിരല് ചൂണ്ടുന്ന ഈ ഇടപെടലിനെ വെള്ളപൂകാനാണോ മുരളീധരന്റെ പ്രസ്താവന എന്ന സംശയം അസ്ഥാനത്തല്ല എന്ന് കോടിയേരി ആരോപിക്കുന്നു.