ഇതുവരെ കാണാത്ത ലുക്കിൽ മഞ്ജു വാര്യർ; ‘കയറ്റം’ പോസ്റ്റർ കാണാം
ഇന്ത്യയുടെ വടക്കേ അറ്റം ഹിമാലയന് പര്വതനിരകളിലൂടെയുള്ള ട്രെക്കിംഗ് പ്രമേയമായി സനല്കുമാര് ശശിധരന് സംവിധാനം ചെയ്യുന്ന മഞ്ജു വാര്യര് കേന്ദ്രകഥാപാത്രമായ കയറ്റം സിനിമയുടെ പോസ്റ്റർ പുറത്തിറങ്ങി. ജോജു നായകനായ ജോസഫ് എന്ന സിനിമയില് ശ്രദ്ധേയമായ വേഷം ചെയ്ത വേദ് വൈബ്സ്, പുതുമുഖം ഗൗരവ് രവീന്ദ്രന് എന്നിവര് മറ്റു പ്രധാന കഥാപാത്രങ്ങളായെത്തുന്നു.
ഇവർക്ക് പുറമെ സുജിത് കോയിക്കല്, രതീഷ് ഈറ്റില്ലം, ദേവനാരായണന്, സോനിത് ചന്ദ്രന്, ആസ്ത ഗുപ്ത, അഷിത, നന്ദു ഠാക്കൂര്, ഭൂപേന്ദ്ര ഖുറാന എന്നിവരും മറ്റു വേഷങ്ങളില് എത്തുന്നു. ഈ സിനിമയുടെ മറ്റൊരു പ്രത്യേകത അഹര്സംസ എന്ന ഭാഷയാണ് . ഈ ഭാഷയില് കയറ്റം എന്നതിനുള്ള വാക്കായ ‘അഹര്’ ആണ് ചിത്രത്തിന്റെ മറ്റൊരു ടൈറ്റില്. അഹര് സംസയിലുള്ള പത്തു പാട്ടുകളിലൂടെ വ്യത്യസ്തമായ രീതിയില് കഥ പറയുന്ന സിനിമയുടെ ഗാനങ്ങള് ചിട്ടപ്പെടുത്തുന്നത് രതീഷ് ഈറ്റില്ലമാണ്.
ചിത്രത്തിലെ എല്ലാ ഗാനങ്ങളും ഷൂട്ടിംഗ് നടന്നിരുന്ന ഹിമാലയന് ട്രെക്കിംഗ് സൈറ്റുകളില് ഓണ് ദി സ്പോട്ട് ഇംപ്രൊവൈസേഷന് ആയിട്ടാണ് ചിട്ടപ്പെടുത്തിയിരിക്കുന്നത്. നിവ് ആര്ട്ട് മൂവീസ്, മഞ്ജു വാര്യര് പ്രൊഡക്ഷന്സ്, പാരറ്റ്മൗണ്ട് പിക്ചേഴ്സ് എന്നീ ബാനറുകളില് ഷാജി മാത്യു, അരുണ മാത്യു, മഞ്ജു വാര്യര്, സനല് കുമാര് ശശിധരന് എന്നിവര് ചേര്ന്നാണ് ചിത്രം നിര്മ്മിക്കുന്നത്.