പായിപ്പാട് സംഭവം; ഗൂഢാലോചന നടത്തിയവരെ അന്വേഷണത്തിലൂടെ പുറത്തുകൊണ്ടുവരും: മുഖ്യമന്ത്രി
പായിപ്പാട്ട് അതിഥി തൊഴിലാളികള് ലോക്ക്ഡൗണ് നിബന്ധനകള് ലംഘിച്ച് തെരുവിലിറങ്ങിയ സംഭവം ദൗര്ഭാഗ്യകരമാണെന്നും സംഭവത്തിൽ ഗൂഢാലോചന നടത്തിയവരെ അന്വേഷണത്തിലൂടെ പുറത്തുകൊണ്ടുവരുമെന്നും മുഖ്യമന്ത്രി പിണറായി വിജയൻ.
അതിഥി തൊഴിലാളികളോട് എല്ലാ ഘട്ടത്തിലും ഏറ്റവും കരുതലോടെയുള്ള നിലപാട് സ്വീകരിച്ച സംസ്ഥാനമാണ് കേരളം. 5000ഓളം ക്യാമ്പുകളിലായി 1,70,000ലേറെ അതിഥി തൊഴിലാളികളെ ഇപ്പോള് സംസ്ഥാനത്ത് പാര്പ്പിച്ചിട്ടുണ്ട്. എവിടെയെങ്കിലും അപാകം കണ്ടെത്തിയാല് ഇടപെട്ട് പരിഹരിക്കാന് ജില്ലാ കലക്ടര്മാര്ക്ക് നിര്ദേശം നല്കിയിട്ടുമുണ്ട് എന്ന് മുഖ്യമന്ത്രി വ്യക്തമാക്കി.
അതിഥി തൊഴിലാളികള് എന്ന സംബോധന തന്നെ ഈ നാടിന്റെ കരുതലിന്റെ സൂചനയാണ്. ഇവിടെ അവര്ക്ക് ജീവിതം മുന്നോട്ടുകൊണ്ടുപോകാന് പറ്റാത്ത ഒരു സാഹചര്യവും നിലവിലില്ല. എന്നിട്ടും പായിപ്പാട്ട് കൂട്ടത്തോടെ അവര് തെരുവിലിറങ്ങിയതിന്റെ പിന്നില് സമൂഹത്തില് അസ്വസ്ഥത സൃഷ്ടിക്കാന് ശ്രമിക്കുന്ന ചില ശക്തികള് ഉണ്ട് എന്ന സൂചനയുണ്ട് എന്ന് മുഖ്യമന്ത്രി തന്റെ ഫേസ്ബുക്ക് പോസ്റ്റിൽ പറയുന്നു.