എന്താണ് നിങ്ങളീ ചവിട്ടുനാടകം കൊണ്ട് നേടിയത്?; മനുഷ്യ മഹാശൃംഖലയ്ക്കെതിരെ കെ സുരേന്ദ്രന്
കേന്ദ്ര സർക്കാർ കൊണ്ടുവന്ന പൗരത്വ നിയമ ഭേദഗതിയ്ക്കെതിരെ കേരളത്തിൽ നടന്ന ഇടതു മുന്നണി നേതൃത്വം കൊടുക്കുന്ന മനുഷ്യ മഹാശൃംഖലയ്ക്കെതിരെ രൂക്ഷ വിമര്ശനവുമായി ബി ജെ പി നേതാവ് കെ സുരേന്ദ്രന്. ഇപ്പോൾ ഉള്ള ഹിന്ദുക്കളുടെ പിന്തുണ കൂടി പോയിക്കിട്ടുമെന്നല്ലാതെ ഈ ചങ്ങലകൊണ്ട് പുതുതായി ഒന്നും ഇവിടെ സംഭവിക്കാനില്ലെന്ന് കെ സുരേന്ദ്രന് പറയുന്നു.
മാത്രമല്ല, അറബിക്കഥയിലെ ക്യൂബാ മുകുന്ദനെപ്പോലെ ബാത്ത്റൂമില്ക്കയറി ഇന്ക്വിലാബ് വിളിക്കേണ്ട ഗതികേടാണ് ചങ്ങലപ്പാര്ട്ടിയെ കാത്തിരിക്കുന്നതെന്നും സുരേന്ദ്രന് തന്റെ ഫേസ്ബുക്ക് പോസ്റ്റിലെ കുറിപ്പിലൂടെ പരിഹസിച്ചു.
ഈ ഇന്ത്യാ മഹാരാജ്യത്ത് ഒന്നരശതമാനം ജനങ്ങളുടെ പിന്തുണപോലും നിങ്ങള്ക്കില്ലെന്നത് നിങ്ങള് തിരിച്ചറിയുന്നില്ലേ? എട്ടും പൊട്ടും തിരിയാത്ത പ്രൈമറി സ്ക്കൂള് കുട്ടികളേയും പാവപ്പെട്ട തൊഴിലുറപ്പു തൊഴിലാളികളേയും ബലം പ്രയോഗിച്ച് അണിനിരത്തി ചങ്ങലപിടിക്കുന്ന ഈ പ്രഹസനം ആരെ ആകര്ഷിക്കാനാണ് സഖാക്കളേ? ന്യൂനപക്ഷങ്ങളെ ഉദ്ദേശിച്ചാണെങ്കില് അവര് നിങ്ങളെ വിശ്വസിക്കുമോ? ഈ രാജ്യത്തെ ന്യൂനപക്ഷങ്ങളില് എത്ര ശതമാനം പേരുടെ പിന്തുണ നിങ്ങള്ക്കുണ്ട്? അദ്ദേഹം എഴുതി.