നിയമ സംവിധാനങ്ങൾക്ക് പുല്ലു വില നൽകി കല്ലട സുരേഷ്: ചോദ്യം ചെയ്യലിന് ഹാജരായില്ല
കല്ലട ബസിൽ യാത്രക്കാരെ മർദിച്ച സംഭവത്തിൽ ബസ് ഉടമ സുരേഷ് കല്ലട ചോദ്യം ചെയ്യലിനായി ഇന്നും പൊലീസിന് മുന്നിൽ ഹാജരാകില്ല. ആരോഗ്യപ്രശ്നമുള്ളതിനാൽ ചോദ്യം ചെയ്യലിന് ഹാജരാകാൻ സാധിക്കില്ലെന്ന് അദ്ദേഹം പൊലീസിനെ അറിയിച്ചു.
ഉയർന്ന രക്ത സമ്മർദ്ദത്തെ തുടർന്ന് തിരുവനന്തപുരത്തെ ആശുപത്രിയിൽ ചികിത്സയിലാണെന്നാണ് സുരേഷ് പറയുന്നത്. യാത്രക്കാരെ മർദിച്ച സംഭവത്തിൽ ഇന്ന് കേസ് അന്വേഷിക്കുന്ന തൃക്കാക്കര അസിസ്റ്റന്റ് കമ്മീഷണർക്ക് മുമ്പാകെ ഹാജരാകാനായിരുന്നു നിർദേശം നൽകിയത്. എന്നാൽ ആശുപത്രിയിൽ ചികിൽസയിലാണെന്ന വിശദീകരണത്തിന്, ചികിൽസാ രേഖകൾ ഹാജരാക്കാൻ സുരേഷിനോട് പൊലീസ് ആവശ്യപ്പെട്ടു. എന്നാൽ ഇതിൽ സുരേഷ് മറുപടി നൽകിയിട്ടില്ല.
ഇന്നുകൂടി ഹാജരായില്ലെങ്കിൽ കല്ലട സുരേഷിനെതിരെ പൊലീസിന്റെ ഭാഗത്തുനിന്നും കടുത്ത നടപടി ഉണ്ടായേക്കുമെന്ന് സൂചനയുണ്ട്.