വിജയ് മല്യയും നീരവ് മോദിയും മെഹുൽ ചോക്സിയും രാജ്യംവിട്ടത് `കാവൽക്കാര´നെ പേടിച്ചെന്ന് രാജ്നാഥ് സിംഗ്
കോടികളുടെ വായ്പാ തട്ടിപ്പു നടത്തിയ വിജയ് മല്യയും നീരവ് മോദിയും മെഹുൽ ചോക്സിയും രാജ്യംവിട്ടത് പ്രധാനമന്ത്രി നരേന്ദ്ര മോദിയെന്ന കാവൽക്കാരനെ പേടിച്ചാണെന്ന് കേന്ദ്ര ആഭ്യന്തരമന്ത്രി രാജ്നാഥ് സിംഗ്. ഉത്തർപ്രദേശിലെ ബുലംദശ്ഹറിൽ തെരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം.
കോൺഗ്രസ് ഭരണകാലത്ത് സാമ്പത്തിക തട്ടിപ്പുകാർ നാട് വിട്ടോടിയിട്ടില്ല. അവരുടെ താവളമായിരുന്നു ഇവിടം. എന്നാൽ ചൗക്കീദാറിന്റെ ഭരണത്തിൽ നീരവ് മോദിയും മെഹുൽ ചോക്സിയും വിജയ് മല്യയും നാടുവിട്ടു. കാവൽക്കാരന്റെ ഭരണത്തിൽ പേടിച്ചാണ് ഇവർ നാടുവിട്ടതെന്നും രാജ്നാഥ് സിംഗ് പറഞ്ഞു.
2014 നു ശേഷമാണ് മൂവരും നാടുവിട്ടത്. കാരണം പുതിയ ജാഗ്രതയുള്ള കാവൽക്കാരൻ അധികാരത്തിലെത്തിയെന്ന് അവർ തിരിച്ചറിഞ്ഞു. ഇവരെ ഉടൻ കോടതിയിൽ പിടിച്ചേൽപ്പിക്കുമെന്നും കേന്ദ്രമന്ത്രി കൂട്ടിച്ചേർത്തു.