കോമിക് മാഗസിൻ ടിങ്കിളിലൂടെ മിന്നൽ മുരളി വീണ്ടും എത്തുന്നു
ബേസിൽ ജോസഫ് സംവിധാനം ചെയ്ത് പ്രദർശനത്തിനെത്തി രാജ്യമാകെ പ്രേക്ഷക ശ്രദ്ധപിടിച്ചു പറ്റിയ സിനിമയാണ് ‘മിന്നൽ മുരളി’. ടൊവിനോ തോമസ് നായകനായ ഈ സിനിമ മലയാളത്തിലെ ആദ്യ സൂപ്പർ ഹീറോ എന്ന പരിവേഷവും സ്വന്തമാക്കിയിരുന്നു.
ടൈറ്റിൽ കഥാപാത്രമായ മിന്നൽ മുരളിയായി ടൊവിനോ മികച്ച പ്രകടനം നടത്തിയപ്പോൾ , വില്ലനായി ഗുരു സോമസുന്ദരവും അഭിപ്രായം നേടി. വിവിധ സിനിമാ മേഖകളിൽ നിന്നും പ്രശംസ പിടിച്ചു പറ്റിയ ഈ ചിത്രത്തിന് രണ്ടാം ഭാഗം ഉണ്ടാകുമെന്ന് നേരത്തെ വാർത്തകൾ പുറത്തുവന്നിരുന്നു. ഈ ചർച്ചകൾ സജീവമായിരിക്കെ പുതിയ ഭാവത്തിൽ മിന്നൽ മുരളി എത്തുന്നുവെന്ന് അറിയിച്ചിരിക്കുകയാണ് സംവിധായകൻ ബേസിൽ.
പ്രമുഖ കോമിക് മാഗസിനായ ടിങ്കിളിലൂടെ ആണ് മിന്നൽ മുരളി വീണ്ടും എത്തുന്നത്. തെലുങ്ക് നടൻ റാണ ദഗ്ഗുബാട്ടിയുടെ സ്പിരിറ്റ് മീഡിയയും സോഫിയാ പോളിന്റെ വീക്കെന്റ് ബ്ലോക്ക്ബസ്റ്റേഴ്സും ചേർന്നാണ് മിന്നൽ മുരളിയുടെ കോമിക് കഥാപാത്രത്തെ വീണ്ടും പ്രേക്ഷകർക്ക് മുന്നിൽ എത്തിക്കുന്നത്. പ്രസിദ്ധമായ സാൻഡിയാഗോ കോമിക് കോണിൽ വെച്ച് മിന്നൽ മുരളിയെ അവതരിപ്പിക്കും.
