രാഹുലിനെയും സോണിയയെയും തേജോവധം ചെയ്യുന്ന മോദിയുടെ നടപടി ആത്മാഭിമാനമുള്ള ഒരു കോണ്ഗ്രസുകാരനും സഹിക്കാനാവില്ല: കെ സുധാകരൻ
രാജ്യത്തിന് വേണ്ടി ധീരരക്തസാക്ഷിത്വം വഹിച്ച കുടുംബത്തിന്റെ കണ്ണികളായ സോണിയ ഗാന്ധിയുടെയും രാഹുല് ഗാന്ധിയുടെയും പാരമ്പര്യവും മഹത്വവും തിരിച്ചറിയാന് മോദിക്ക് കഴിയില്ല. മോദിയേയും കൂട്ടരേയും പോലെ രാജ്യത്തിന്റെ സമ്പത്ത് കൊള്ളയടിച്ച് കൊണ്ടുപോകണ്ട ഗതികേട് നെഹ്റു കുടുംബത്തിനില്ല എന്നും കെപിസിസി പ്രസിഡന്റ് കെ സുധാകരൻ.
ബിജെപിയുടെ രാഷ്ട്രീയ പ്രതികാരത്തിന്റെയും കുടിപ്പകയുടെയും ബാക്കിപത്രമാണ് നാഷണല് ഹെറാള്ഡ് കേസുമായി ബന്ധപ്പെട്ട് കോണ്ഗ്രസ് അധ്യക്ഷ സോണിയ ഗാന്ധിക്കും രാഹുല് ഗാന്ധിക്കും എതിരായ കേന്ദ്ര സര്ക്കാരിന്റെ നടപടിയാണെന്നും അദ്ദേഹം വിശേഷിപ്പിച്ചു.
തീവ്ര സംഘപരിവാർ പക്ഷക്കാരനായ ഒരു വ്യക്തിനല്കിയ കേസില് നാളിതുവരെ അന്വേഷിച്ചിട്ടും തെളിവുകള് ശേഖരിക്കാന് കേന്ദ്ര ഏജന്സികള്ക്ക് കഴിയാതെ പോയത് ഈ കേസുമായി ബന്ധപ്പെട്ട ആരോപണത്തില് സത്യത്തിന്റെ കണികപോലും ഇല്ലാത്തതിനാലാണ്. ബിജെപിയുമായി ഒരുവിധത്തിലും സന്ധിച്ചെയ്യാന് കോണ്ഗ്രസ് തയ്യാറാകാത്തതിനാലാണ് ഈ കേസ് കഴിഞ്ഞ എട്ടുവര്ഷമായി നീട്ടിക്കാണ്ടുപോകുന്നത്. അതേസമയം ബിജെപിയുമായി രഹസ്യകരാര് ഉണ്ടാക്കിയ കേസുകളില് കേന്ദ്ര ഏജന്സികളുടെ അന്വേഷണം എങ്ങനെയെല്ലാം അട്ടിമറിക്കപ്പെടുന്നുയെന്ന് കേരളത്തിലെ സ്വര്ണ്ണക്കടത്ത് കേസ് ഉള്പ്പെടെയുള്ളവ പരിശോധിച്ചാല് ബോധ്യമാകുമെന്നും സുധാകരൻ പറയുന്നു.
കേന്ദ്രസർക്കാരിന്റെ കീഴിലുള്ള ഏജന്സികളെ പലപ്പോഴും വൃത്തികെട്ട രാഷ്ട്രീയ നേട്ടത്തിനായി കേന്ദ്രസര്ക്കാര് ഉപയോഗിച്ചിട്ടുണ്ട്. കോണ്ഗ്രസിന് പുറമെ തൃണമൂൽ കോൺഗ്രസ്, എൻ സി പി, എസ് പി, ആർ ജെ ഡി തുടങ്ങി ഒട്ടുമിക്ക പ്രതിപക്ഷ പാർട്ടികളും ഇഡി വേട്ടക്ക് ഇരകളായവരാണ്.
സംഘപരിവാര് ശക്തികള് ഉയര്ത്തുന്ന ഫാസിസ്റ്റ് വെല്ലുവിളികളെ തന്റേടത്തോടെ നേരിടുകയും രാജ്യത്തിന്റെ മതേതരത്വം സംരക്ഷിക്കാന് പോരാടുകയും ചെയ്യുന്ന നേതാക്കളാണ് രാഹുല് ഗാന്ധിയും സോണിയാ ഗാന്ധിയും. അവരെ തേജോവധം ചെയ്യുന്ന മോദിയുടെ നടപടി ആത്മാഭിമാനമുള്ള ഒരു കോണ്ഗ്രസുകാരനും സഹിക്കാനാവില്ലല്ലെന്നും രാഷ്ട്രീയ പകയുടെ പേരില് ഇത്തരം നടപടികള് തുടരാനാണ് മോദിയും സംഘപരിവാര് ശക്തികളും ശ്രമിക്കുന്നതെങ്കില് കയ്യുംകെട്ടി വെറുതെയിരിക്കാന് കോണ്ഗ്രസ് പ്രവര്ത്തകര്ക്കാവില്ലെന്നും സുധാകരന് വ്യക്തമാക്കി.