നടിയെ ആക്രമിച്ച കേസ്; പ്രധാന സാക്ഷി സാഗറിനെ മൊഴി മാറ്റാന് പ്രേരിപ്പിച്ചത് ദിലീപും സംഘവും; തെളിവുകള് പുറത്തുവന്നു
കൊച്ചിയില് വാഹനത്തിനുള്ളിൽ നടിയെ ആക്രമിച്ച കേസിലെ പ്രധാന സാക്ഷി സാഗറിനെ മൊഴി മാറ്റാന് പ്രേരിപ്പിച്ചത് പ്രതിയായ ദിലീപും സംഘവുമെന്ന് തെളിയിക്കുന്ന രേഖകള് പുറത്ത്. ദിലീപിന്റെ ഭാര്യ കാവ്യ മാധവന്റെ ഡ്രൈവറായ സുനീറും ദിലീപിന്റെ അഭിഭാഷകനായ ഫിലിപ്പും ആലപ്പുഴയിലെ റെയ്ബാന് ഹോട്ടലില് വെച്ച് സാഗറിന് പണം കൈമാറിയെന്നതിന്റെ തെളിവുകളാണ് റിപ്പോര്ട്ടര് ടി വിയാണ് പുറത്തുവിട്ടത്.
കേസുമായി ബന്ധപ്പെട്ട് സാഗറിന്റെ മനസുമാറ്റിയെടുത്ത് പണം കൈമാറിയ കാര്യം ദിലീപിനോട് സഹോദരന് അനൂപ് പറയുന്നതിന്റെ ശബ്ദരേഖകളും ഇതോടൊപ്പം പുറത്തുവന്നിട്ടുണ്ട്. അതേസമയം, ഹോട്ടലില് മുറിയെടുത്തത് സുധീറിന്റെ പേരിലാണെന്ന് തെളിയിക്കുന്ന ഹോട്ടല് രജിസ്റ്ററിന്റെ പകര്പ്പും ഇതുമായി ബന്ധപ്പെട്ട് ദിലീപിന്റെ സഹോദരന് അനൂപിന്റെ ശബ്ദരേഖയും ചാനൽ പുറത്തുവിട്ടു.
സാഗര് ഫിലിപ്പച്ചായനെ( ദിലീപിന്റെ അഭിഭാഷകന്) കാണാന് പോയോ എന്ന് ദിലീപ് ചോദിക്കുന്നതും നമ്മുടെ സ്വിഫ്റ്റില് ആലപ്പുഴയില് കൊണ്ടുപോയി മനസ് മാറ്റിയെടുത്തു എന്ന് അനൂപ് പറയുന്നതും ഓഡിയോയില് കേൾക്കാൻ സാധിക്കും.