യുപിയില് കന്യാസ്ത്രീകളെ അതിക്രമിച്ച സംഭവത്തില് കേന്ദ്ര ആഭ്യന്തരമന്ത്രി അമിത് ഷായ്ക്ക് കത്തയച്ച് മുഖ്യമന്ത്രി
ഉത്തര്പ്രദേശിലെ ഝാന്സിയില് കന്യാസ്ത്രീകളെ ആക്രമിച്ചവര്ക്കെതിരെ കര്ശന നടപടിയാവശ്യപ്പെട്ട് കേന്ദ്ര ആഭ്യന്തരമന്ത്രി അമിത് ഷായ്ക്ക് മുഖ്യമന്ത്രി കത്തയച്ചു. ബജ്റംഗ്ദള് പ്രവര്ത്തകരും ഝാന്സി പൊലീസും ചേര്ന്നാണ് കന്യാസ്ത്രീകളേയും പുതുതായി ക്രിസ്തുമതം സ്വീകരിച്ചവരേയും ഉപദ്രവിച്ചതെന്ന് മുഖ്യമന്ത്രി പിണറായി വിജയന് കത്തില് ചൂണ്ടിക്കാട്ടി.
ഇന്ത്യാ രാജ്യത്തിന്റെ പ്രതിഛായയ്ക്കും മതസഹിഷ്ണുത പാരമ്പര്യത്തിനും കളങ്കമുണ്ടാക്കുന്ന പ്രവൃത്തിയാണ് ഉണ്ടായത്. ഭരണഘടന ഉറപ്പു നല്കുന്ന വ്യക്തിസ്വാതന്ത്ര്യത്തിനെതിരായ ഈ ആക്രമണത്തെ ഗൗരവമായി കാണണം. സംഭവത്തെ കേന്ദ്രസര്ക്കാര് അപലപിക്കണമെന്നും മുഖ്യമന്ത്രി ആവശ്യപ്പെട്ടു.കഴിഞ്ഞ ദിവസം ഡല്ഹിയില് നിന്ന് ഒഡിഷയിലേക്കുള്ള യാത്രക്കിടെ ഝാന്സിയില്വച്ചാണ് തിരുഹൃദയ സന്യാസി സഭയിലെ മലയാളി ഉള്പ്പെടെയുള്ള നാല് കന്യാസ്ത്രീകള്ക്ക് നേരെ ആക്രമണം ഉണ്ടായത്. മതം മാറ്റാന് ശ്രമിക്കുകയാണെന്ന് ആരോപിച്ച് ബജ്റംഗ്ദള് പ്രവര്ത്തകരാണ് ആക്രമണം നടത്തിയത്. മതം മാറ്റ നിരോധന നിയമമനുസരിച്ച് കേസെടുക്കാനും ശ്രമമുണ്ടായതായി പറയുന്നു