കേരളത്തിൽ ബിജെപി പ്രഖ്യാപിച്ചിരിക്കുന്നത് ശക്തൻമാരായ സ്ഥാനാർത്ഥികളെ: പത്തനംതിട്ടയിലെ കാര്യം അറിയില്ല: ശ്രീധരൻപിള്ള
ലോക്സഭാ തെരഞ്ഞെടുപ്പിനുള്ള ശക്തരായ സ്ഥാനാര്ത്ഥികളെയാണ് ഇത്തവണ ബിജെപി പ്രഖ്യാപിച്ചിരിക്കുന്നതെന്നു ബിജെപി സംസ്ഥാന അധ്യക്ഷൻ പി.എസ്.ശ്രീധരൻപിള്ള. എന്നാൽ പത്തനംതിട്ടയിലെ സ്ഥാനാര്ത്ഥിയെ പ്രഖ്യാപിക്കാത്തത് എന്തുകൊണ്ടാണെന്ന് തനിക്കറിയില്ലെന്നും അദ്ദേഹം പറഞ്ഞു. ഇക്കാര്യം ബിജെപി ദേശീയ നേതൃത്വത്തോടാണ് ചോദിക്കേണ്ടതെന്നും ബിജെപി സംസ്ഥാന അധ്യക്ഷൻ പറഞ്ഞു.
കേരളത്തിലെ സ്ഥാനാർഥികളുടെ കാര്യത്തിൽ അന്തിമ തീരുമാനമായ ശേഷമാണ് ഡൽഹിയിൽ നിന്ന് മടങ്ങിവന്നത്. എന്നാൽ ഒരു സീറ്റില് മാത്രം സ്ഥാനാര്ത്ഥി പ്രഖ്യാപനം വരാത്തതിനെപ്പറ്റി അറിയില്ലെന്നും ശ്രീധരന് പിള്ള വ്യക്തമാക്കി.
ബിജെപി സ്ഥാനാർഥികളുടെ ആദ്യ പട്ടികയിൽ കേരളത്തിൽ മത്സരിക്കുന്ന 13 സീറ്റുകളിലെ 12 ഇടങ്ങളിലെ സ്ഥാനാര്ഥികളെയാണ് പ്രഖ്യാപിച്ചത്. കേന്ദ്രമന്ത്രി ജെ.പി. നദ്ദയാണ് കേരളത്തിലെ ഉൾപ്പെടെ 182 മണ്ഡലങ്ങളിലേക്കുള്ള സ്ഥാനാർഥികളെ ഔദ്യോഗികമായി പ്രഖ്യാപിച്ചത്. കേരളത്തിൽ പത്തനംതിട്ട സീറ്റിലെ സ്ഥാനാർഥിയെ കുറിച്ച് മാത്രമാണ് തീരുമാനം ആകാത്തത്.