അധികാരത്തിലെത്താൻ ബിജെപി തന്നെ ഉപയോഗിച്ചു: അന്നാ ഹസാരെ
കഴിഞ്ഞ ലോക്സഭാ തെരഞ്ഞെടുപ്പിൽ വിജയിക്കാൻ ബിജെപി തന്നെ ഉപയോഗിച്ചതായി അന്നാഹ സാരെ. ലോക്പാൽ നിയമം നടപ്പിലാക്കണമെന്നും കർഷകരുടെ ദുരിതം അവസാനിപ്പിക്കണമെന്നും ആവശ്യപ്പെട്ട് നടത്തുന്ന നിരാഹാര സമരവേദിയിലാണ് അന്നാ ഹസാരെ ബിജെപിക്കെതിരെ രൂക്ഷ വിമർശനവുമായി രംഗത്തെത്തിയത്.
എന്നെ 2014 ലോക്സഭാ തെരഞ്ഞെടുപ്പിൽ ബിജെപി ഉപയോഗിച്ചു. അത് എല്ലാവർക്കും അറിയാം. ലോക്പാലിനുവേണ്ടിയുള്ള എന്റെ സമരം ബിജെപിയേയും ആം ആദ്മി പാർട്ടിയേയും അധികാരത്തിലെത്തിക്കാൻ സഹായിച്ചു. എന്നാൽ അവരുടെ ആദരവുകളെല്ലാം ഇപ്പോൾ തനിക്ക് നഷ്ടമായെന്നും അന്നാഹ ഹസാരെ പറഞ്ഞു.
മഹാരാഷ്ട്രയിലെ ബിജെപി സർക്കാരിനെതിരെയും അന്നാഹ ഹസാരെ രൂക്ഷ വിമർശനം ഉന്നയിച്ചു. കഴിഞ്ഞ നാലു വർഷമായി ബിജെപിയുടെ നേതൃത്വത്തിലുള്ള മഹാരാഷ്ട്ര സർക്കാർ കള്ളങ്ങൾ മാത്രം പറഞ്ഞുകൊണ്ടിരിക്കുകയാണ്. സംസ്ഥാന സർക്കാർ പറയുന്നത് താൻ ഉന്നയിച്ച ആവശ്യങ്ങളിൽ 90 ശതമാനവും അംഗീകരിച്ചെന്നാണ്. എല്ലാം നുണയാണ്. എത്രനാൾ നുണകൾ തുടരാൻ കഴിയും എന്നും ഹസാരെ ചോദിച്ചു.