മോദി സർക്കാർ ലോക്പാൽ നിയമം നടപ്പാക്കിയില്ലെങ്കിൽ പത്മഭൂഷൺ പുരസ്കാരം തിരികെ നൽകും: അന്നാഹസാരെ
അടുത്ത ഏതാനും ദിവസങ്ങൾക്കുള്ളിൽ മോദി സർക്കാർ രാജ്യത്തിനു നൽകിയ വാഗ്ദാനങ്ങൾ നിറവേറ്റിയില്ലെങ്കിൽ താൻ പത്മഭൂഷൺ പുരസ്കാരം തിരികെ നൽകുമെന്നു അന്നാഹസാരെ. പിടിഐ ന്യൂസിനോടാണ് അന്നാഹസാരെ ഇക്കാര്യം പറഞ്ഞത്. കൂടാതെ മോദി വിശ്വാസവഞ്ചന കാട്ടിയിരിക്കുകയാണെന്നും അന്നാഹസാരെ കൂട്ടിച്ചേർത്തു.
അതെ സമയം അന്നാഹസാരെയുടെ നിരാഹാരസമരം ആറാം ദിവസത്തിലേക്ക് കടന്നിരിക്കുകയാണ്. അഹമ്മദ്നഗറിലെ ജന്മഗ്രാമമായ റാലേഗൺ സിദ്ധിയിലാണു ഹസാരെ സമരം നടത്തുന്നത്. ഇതിനിടെ സമരത്തിന് പിന്തുണയുമായി ബിജെപിയുമായി പിണങ്ങി നിൽക്കുന്ന ശിവസേന രംഗത്തെത്തി.
അന്നാഹസാരെയുടെ സമരത്തിന് ഐക്യദാർഢ്യമായി ഗ്രാമവാസികൾ ഞായറാഴ്ച സംസ്ഥാ നപാത ഉപരോധിച്ചു. അഹമ്മദ് നഗർ-പൂന സംസ്ഥാനപാതയിൽ മണിക്കൂറുകളോളം പ്രവർത്തകർ ഗതാഗതം സ്തംഭിപ്പിക്കുകയായിരുന്നു. ഇതോടെ റോഡിന് ഇരുഭാഗത്തും ആറുകിലോമീറ്ററോളം ദൂരത്തിൽ വാഹനങ്ങൾ നിരന്നു. അനുനയനീക്കങ്ങൾ പരാജയപ്പെട്ടതോടെ നൂറോളം പ്രവർത്തകരെ പോലീസ് അറസ്റ്റ് ചെയ്തു നീക്കിയാണു ഗതാഗതം പുനഃസ്ഥാപിച്ചത്.