പ്രവാസികള്‍ അന്വേഷിച്ച കെഎസ്ആര്‍ടിസിയിലെ ആ കണ്ടക്ടര്‍ ഇതാ
പ്രവാസി യാത്രക്കാരുടെ ലഗേജുകള്‍ ഇറക്കാനും കയറ്റാനും സഹായിക്കുന്ന കെഎസ്ആര്‍ടിസി കണ്ടക്ടറുടെ വീഡിയോ കഴിഞ്ഞ ദിവസം സോഷ്യല്‍ മീഡിയയില്‍ വൈറലായിരുന്നു. വീഡിയോ വൈറലായതോടെ നിരവധി പേരാണ് ഈ കണ്ടക്ടറെ അഭിനന്ദിച്ച് രംഗത്ത് വന്നിരുന്നത്. ഒടുവില്‍ കോട്ടക്കല്‍ കോട്ടൂര്‍ സ്വദേശിയായ ഫൈസല്‍ കറുത്തേടത്താണ് നവമാധ്യമങ്ങള്‍ താരമാക്കിയ കണ്ടക്ടര്‍ എന്ന് കണ്ടെത്തി.
സംഭവം വൈറലായതൊന്നും ഫൈസല്‍ അറിഞ്ഞിരുന്നില്ല. കൂട്ടുകാര്‍ വിളിച്ചപ്പോഴാണ് അറിയുന്നത്. ഭൂരിഭാഗം കണ്ടക്ടര്‍മാരും ചെയ്യുന്ന പ്രവൃത്തിയേ താനും ചെയ്തിട്ടുള്ളുവെന്നാണ് ഫൈസല്‍ പറയുന്നത്. കെ.എസ്.ആര്‍.ടി.സിയെ കരകയറ്റാന്‍ എല്ലാവരും ശ്രമിക്കണമെന്നു ഫൈസല്‍ പറയുന്നു. എട്ടുവര്‍ഷമായി കെ.എസ്.ആര്‍.ടി.സിയില്‍ കണ്ടക്ടറായി ജോലി ചെയ്യുന്നു.
എം പാനല്‍ നിയമനം മൂലം ഉറ്റ സുഹൃത്തുക്കളെ നഷ്ടപ്പെട്ടതായും ഫൈസല്‍ പറഞ്ഞു. പെരുങ്കുളം താഹിര്‍ കുട്ടി ഖദീജ എന്നിവരുടെ മകനാണ്. സഹോദരങ്ങളായ ജലീല്‍ കറുത്തേടത്ത് മഞ്ചേരി എസ്.ഐയും, സഫീര്‍ അസ്ലം മലപ്പുറം സ്റ്റേഷനിലെ സി.പി ഒ യുമാണ്. ഹഫ്‌സത്താണ് ഭാര്യ. അജ്മല്‍ മഹമൂദ് ഏക മകനാണ്.
കഴിഞ്ഞ ശനിയാഴ്ചയാണ് നെടുമ്പാശ്ശേരിയില്‍ നിന്നും പട്ടാമ്പി മലപ്പുറം വഴി കോഴിക്കോട്ടേക്കുള്ള ലോ ഫ്‌ളോര്‍ ബസില്‍ യാത്രക്കാര്‍ക്കൊപ്പം ലഗേജുകള്‍ കയറ്റാനും ഇറക്കാനും ഫൈസല്‍ ഒപ്പം കൂടിയത്. പട്ടാമ്പിയിലെത്തിയപ്പോള്‍ അഞ്ചോളം യാത്രക്കാര്‍ ഒരുമിച്ചിറങ്ങി. ഒപ്പം കണ്ടക്ടറും.
ഓരോ ബാഗുകളും ചോദിച്ചറിഞ്ഞ് ഇറക്കുന്ന വീഡിയോ മറ്റൊരു യാത്രക്കാരന്‍ മൊബെലില്‍ പകര്‍ത്തി ഫെയ്‌സ് ബുക്കിലിട്ടു. കെ.എസ്.ആര്‍.ടി.സി കാണണം ഈ കണ്ടക്ടറുടെ ആത്മാര്‍ത്ഥത എന്ന അടിക്കുറിപ്പോടെയായിരുന്നു പ്രചരണം. ഇതോടെ സമൂഹമാധ്യമം ഇതേറ്റെടുക്കുകയായിരുന്നു.
