തമിഴ്‌നാട്ടില്‍ കമ്മ്യൂണിസ്റ്റ് സര്‍ക്കാര്‍ വേണം; പിണറായി വിജന്‍ ആദര്‍ശധീരനായ നേതാവ്: തമിഴ് സിനിമാ താരം സത്യരാജ്
കേരളത്തിലേതുപോലെ തമിഴ്‌നാട്ടിലും കമ്മ്യൂണിസ്റ്റ് സര്‍ക്കാര്‍ വേണമെന്ന്തമിഴ് സിനിമാ താരം സത്യരാജ്. പിണറായി വിജയന്‍ ആദര്‍ശ ധീരനായ നേതാവാണ്. അദ്ദേഹത്തിന് സമാനരായ ആളുകള്‍ തമിഴ്‌നാടിനും ആവശ്യമാണ് എന്നും സത്യരാജ് പറഞ്ഞു. മനോരമ ന്യൂസിനോടായിരുന്നു അദ്ദേഹത്തിന്റെ പ്രതികരണം.
തമിഴ് രാഷ്ട്രീയത്തിലേക്കുള്ള സിനിമാക്കാരുടെ കടന്നുകയറ്റത്തെ അദ്ദേഹം രൂക്ഷമായി വിമര്‍ശിച്ചു. സിനിമാ താരങ്ങള്‍ രാഷ്ട്രീയത്തിലിറങ്ങുന്നത് തമിഴ്‌നാട്ടില്‍ സാധാരണമാണ്. എന്നാല്‍ ഇത്തരക്കാരുടെ ലക്ഷ്യം മുഖ്യമന്ത്രി കസേരമാത്രമാണ് ജനസേവനമല്ലെന്നും അദ്ദേഹം വിമര്‍ശിച്ചു.
ഇത് ഇനി തമിഴ്‌നാട്ടില്‍ നടക്കില്ലെന്നും അദ്ദേഹം പറഞ്ഞു. കമല്‍ഹാസന്റെ രാഷ്ട്രീയപ്രവേശനത്തെക്കുറിച്ച് ചോദിച്ചപ്പോഴാണ് അദ്ദേഹത്തിന്റെ പ്രതികരണം. നാല്‍പ്പത്തിയൊന്ന് വര്‍ഷമായി താന്‍ സിനിമയിലുണ്ട്. തനിക്കിതുവരെ രാഷ്ട്രീയത്തിലിറങ്ങണമെന്ന് തോന്നിയിട്ടില്ലെന്നും സത്യരാജ് പറഞ്ഞു. പുതിയ ചിത്രമായ കനായുടെ പ്രരണാര്‍ഥമാണ് സത്യരാജ് കൊച്ചിയിലെത്തിയത്.
