‘അന്ന് സാര്‍ എന്നെ ചെയ്തതൊക്കെ തന്നെയേ ഇപ്പോഴും ചെയ്തിട്ടുള്ളൂ; കൂടുതല്‍ വേണേല്‍ കാശ് വേറെ തരണം സാറേ’: ഇടപാടുകാരനെ അമ്പരപ്പിച്ച ‘ഒരുത്തി’
വ്യത്യസ്തമായ പ്രമേയം കൈകാര്യം ചെയ്ത് ശ്രദ്ധേയമാകുകയാണ് ഒരുത്തിയെന്ന ഹ്രസ്വചിത്രം. ലൈംഗിക തൊഴിലാളിയായിരുന്നാല്‍ പോലും ഒരു സ്ത്രീയോട് പെരുമാറേണ്ടത് മാന്യതയോടെ വേണം എന്ന് ഓര്‍മ്മിപ്പിക്കുന്ന ചിത്രം ശക്തമായ പ്രമേയമാണ് മുന്നോട്ട് വയ്ക്കുന്നത്. പരസ്ത്രീ ബന്ധത്തിന് എത്തുന്ന ഒരു കുടുംബാഥനും, ലൈംഗിക തൊഴിലാളിയുമാണ് ചിത്രത്തിലുള്ളത്.
ഒരു വഷളന്‍ ചിരിയും കൈയിലൊരുപിടി നോട്ടുകെട്ടുകളുമായി രാത്രിയുടെ മറപിടിച്ച് ലൈംഗികദാഹം ശമിപ്പിക്കാനെത്തുന്ന ഒരു പുരുഷനിലൂടെയാണ് ഒരുത്തി എന്ന ഹ്രസ്വചിത്രം ആരംഭിക്കുന്നത്. ‘വേശ്യ വേശ്യയുടെ പണിയെടുത്താ മതി..’ ചെയ്ത പണിക്ക് കൂലി ചോദിച്ച് ഇടപാടുകാരനെ അമ്പരപ്പിച്ച ഒരുത്തി എന്നതാണ് ഹ്രസ്വചിത്രത്തിന്റെ ടാഗ് ലൈന്‍.
ആഘോഷ് വൈഷ്ണവം സംവിധാനം ചെയ്ത ഹ്രസ്വചിത്രത്തില്‍ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത് സംവിധായകന്‍ ബോബന്‍ സാമുവലും വരദയുമാണ്. ഗായത്രി അയ്യറാണ് ചിത്രത്തിനായി സംഗീതം ഒരുക്കിയിരിക്കുന്നത്.
