ലോറി സമരം: പഴം, പച്ചക്കറി വില കുതിച്ചുയരുന്നു
ലോറി സമരം പച്ചക്കറി വിപണിയെ ബാധിച്ചുതുടങ്ങി. പച്ചമുളക്, സവാള, ഉരുളക്കിഴങ്ങ് തുടങ്ങിയവയുടെ വില വര്ധിച്ചു. സമരം തുടങ്ങിയതോടെ പച്ചക്കറി വരവ് കുറഞ്ഞതാണ് വിലക്കയറ്റത്തിന് ഇടയാക്കിയതെന്ന് വ്യാപാരികള് പറയുന്നു.
വ്യാഴാഴ്ച അര്ധരാത്രി മുതല് ആരംഭിച്ച അനിശ്ചിതകാല ചരക്ക് ലോറി സമരം വിപണിയെ ബാധിച്ചു. അതിര്ത്തി കടന്നുളള പച്ചക്കറി വരവ് കുറഞ്ഞതോടെ വിലക്കയറ്റം അനുഭവപ്പെട്ടു തുടങ്ങി.സമരം ഉടന് അവസാനിക്കുന്നില്ലെങ്കില് വില ഇനിയും ഉയരുമെന്നാണ് വ്യാപാരികള് പറയുന്നത്.
ഉള്ളിക്കും തക്കാളിക്കുമെല്ലാം രണ്ടു മുതല് നാല് രൂപ വരെ വര്ധിച്ചപ്പോള് ഉരുളക്കിഴങ്ങിന് ആറ് രൂപയുടെ വര്ധനവാണുണ്ടായത്. തിങ്കളാഴ്ച വരെ 18 രൂപയ്ക്ക് വിറ്റിരുന്ന സവാള ഇന്ന് 22 രൂപയ്ക്കാണ് വില്ക്കുന്നത്. 18 രൂപയായിരുന്ന തക്കാളി 22 രൂപയായി. 22 രൂപയുണ്ടായിരുന്ന ഉരുളക്കിഴങ്ങിന് 28 രൂപയായെന്നും പച്ചക്കറി മൊത്തവിതരണ വ്യാപാരികള് വ്യക്തമാക്കി.
അനിയന്ത്രിതമായ ഡീസല് വിലവര്ധന പിന്വലിക്കുക, തേര്ഡ് പാര്ട്ടി ഇന്ഷൂറന്സ് പ്രീമിയം വര്ധനവ് പിന്വലിക്കുക, അശാസ്ത്രീയമായ ടോള് പിരിവ് അവസാനിപ്പിക്കുക തുടങ്ങിയ ആവശ്യങ്ങള് ഉന്നയിച്ചാണ് പണിമുടക്ക്.