ഓര്ത്തഡോക്സ് വൈദികര്ക്ക് തിരിച്ചടി: അറസ്റ്റ് തടയാനാവില്ലെന്ന് ഹൈക്കോടതി
കൊച്ചി: ഓര്ത്തഡോക്സ് വൈദികര്ക്കെതിരായ പീഡനക്കേസില് വെദികരുടെ അറസ്റ്റ് ഹൈക്കോടതി തടഞ്ഞില്ല. വെദികരുടെ മുന്കൂര് ജാമ്യാപേക്ഷ കോടതി തിങ്കളാഴ്ച വീണ്ടും പരിഗണിക്കും. പ്രതികള് കോടതിയില് ഹാജരാക്കിയ യുവതിയുടെ സത്യവാങ്മൂലം വിശ്വാസത്തിലെടുക്കാന് കഴിയില്ലെന്ന് കോടതി വ്യക്തമാക്കി.
സത്യവാങ്മൂലത്തില് പറയുന്ന കാര്യങ്ങള് സത്യമാണെങ്കില് ബാലിശമായ ആക്ഷേപങ്ങള് മാത്രമേ വൈദികര്ക്കെതിരെയുള്ളുവെന്നും എന്നാല് യുവതിയുടെ മൊഴി ലഭിക്കാതെ അത് വിശ്വാസത്തിലെടുക്കാന് പറ്റില്ലെന്നും കോടതി അറിയിച്ചു. യുവതിയുടെ സത്യപ്രസ്താവന എന്ന നിലയില് മുദ്രപത്രത്തില് ഹാജരാക്കിയത് വിശ്വാസത്തിലെടുക്കാനാവില്ല.
മൊഴി തന്നെയാണ് നിയമപരമായി നിലനില്ക്കുന്നത്. അതുകൊണ്ട് യുവതിയുടെ വിശദമായ മൊഴി ഹാജരാക്കാനും കോടതി നിര്ദേശിച്ചു. പരസ്പര സമ്മതത്തോടെയുള്ള ലൈംഗിക ബന്ധമെന്നാണ് സത്യവാങ്മൂലത്തില് പറയുന്നത്. അത് ഗൗരവപരമായ കുറ്റമല്ല. അതുകൊണ്ട് അറസ്റ്റ് തടയണമെന്നാണ് വൈദികര് ആവശ്യപ്പെട്ടത്.
എന്നാല് എഫ്.ഐആര് ഇട്ടതിന്റെ മഷി ഒണങ്ങിയിട്ടില്ലെന്നും അറസ്റ്റ് തടയുന്നത് അന്വേഷണത്തെ ബാധിക്കുമെന്നും സര്ക്കാര് അഭിഭാഷകന് കോടതിയെ അറിയിച്ചു. മൊഴിയുടെ വിശദാംശങ്ങള് ഇന്ന് തന്നെ നല്കണമെന്ന് കോടതി ആവശ്യപ്പെട്ടു. എന്നാല് നാല് ദിവസം വേണമെന്ന് സര്ക്കാര് അറിയfച്ചു. തുടര്ന്ന് വിശദമായ മൊഴിപകര്പ്പ് ലഭിച്ച ശേഷം തിങ്കളാഴ്ച പരിഗണിക്കാനായി കോടതി കേസ് മാറ്റിവെക്കുകയായിരുന്നു.