സിനിമയ്ക്ക് പുറത്ത് മത്സ്യക്കച്ചവടക്കാരന്റെ റോളില് ധര്മ്മജന്; ഉദ്ഘാടകനായി കുഞ്ചാക്കോ ബോബന്
ഫിഷ് ഹബ്ബുമായി നടന് ധര്മ്മജന് ബോള്ഗാട്ടി. കൊച്ചിക്കാര്ക്ക് വിഷം തീണ്ടാത്ത മീന് ലഭ്യമാക്കുകയെന്ന ലക്ഷ്യത്തോടെയാണ് ധര്മ്മജന് വെള്ളിത്തിരയ്ക്ക് പുറത്ത് മത്സ്യക്കച്ചവടക്കാരന്റെ റോളിലെത്തുന്നത്. ധര്മ്മൂസ് ഫിഷ് ഹബ്ബ് എന്ന് പേരിട്ട ഫിഷ് ഹബ്ബിന്റെ ആദ്യ വില്പനകേന്ദ്രം ജൂലൈ അഞ്ചിന് കൊച്ചി അയ്യപ്പന്കാവിന് സമീപം പ്രവര്ത്തനം തുടങ്ങും.
നടന് കുഞ്ചാക്കോ ബോബന് ആണ് ഉദ്ഘാടനം ചെയ്യുന്നത്. ധര്മ്മജന്റെ ഉറ്റസുഹൃത്തുക്കള് കൂടിയായ 11 പേരുമായി ചേര്ന്നാണ് ഫിഷ് ഹബ്ബ് യാഥാര്ഥ്യമാക്കുന്നത്. ഇതര സംസ്ഥാനങ്ങളില് നിന്നുള്ള വിഷം തീണ്ടിയ വലിയ മീനുകള്ക്ക് പകരം കൊച്ചിക്കാര്ക്ക് നല്ല പിടയ്ക്കുന്ന കായല്മീനുകള് എത്തിച്ചുനല്കുകയെന്ന ലക്ഷ്യത്തോടെയാണ് ധര്മജനും കൂട്ടുകാരും ഫിഷ് ഹബ്ബ് ശൃംഖലയുമായി എത്തുന്നത്.
ചെമ്മീന് കെട്ടിലും കൂട് കൃഷിയിലും വളര്ത്തുന്ന മത്സ്യങ്ങള്ക്ക് പുറമേ പരമ്പരാഗത മത്സ്യത്തൊഴിലാളികള്, വീശ് വലകള് ഉപയോഗിക്കുന്നവര് എന്നിവരില് നിന്നെല്ലാം മീന് ശേഖരിച്ച് വില്പനയ്ക്കെത്തിക്കും. ചെറുമീനുകള് വൃത്തിയാക്കി ഓര്ഡര് അനുസരിച്ച് വീടുകളിലും ഫ്ലാറ്റുകളിലുമെത്തിച്ചും നല്കും.