സംഘര്ഷഭൂമിയായി കോട്ടയം: പൊലീസ് വീണ്ടും പ്രതിക്കൂട്ടിലാകുന്നത് ചെങ്ങന്നൂരില് വോട്ടെടുപ്പ് പുരോഗമിക്കുന്നതിനിടെ: പ്രതികളെല്ലാം ഡിവൈഎഫ്ഐ പ്രവര്ത്തകര്
കോട്ടയം: പ്രണയ വിവാഹത്തെ തുടര്ന്ന് തട്ടിക്കൊണ്ടു പോകപ്പെട്ട കോട്ടയം സ്വദേശി കെവിന് ക്രൂരമര്ദനത്തിനിരയായാണ് കൊല്ലപ്പെട്ടതെന്ന് സൂചന. പുനലൂര് ചാലിയേക്കരയില് തോട്ടില്നിന്നും ലഭിച്ച മൃതദേഹത്തിന്റെ കണ്ണുകള് ചൂഴ്ന്നെടുത്ത നിലയിലാണ്.
തലയില് ആഴത്തിലുള്ള മുറിവും ഉണ്ടെന്നാണ് റിപ്പോര്ട്ട്. ഇന്ന് പുലര്ച്ചെയാണ് തോട്ടില്നിന്നും മൃതദേഹം കണ്ടെത്തിയത്. യുവാവിന്റെ മരണം കൊലപാതകമാണെന്ന് പോലീസ് സാഹചര്യ തെളിവുകള് വച്ച് സ്ഥിരീകരിച്ച് കഴിഞ്ഞു. ശരീരം നിലത്തുകൂടെ വലിച്ചിഴച്ചതിന്റെ പാടുകളും ദൃശ്യമാണ്. മൃതദേഹം തിരുവനന്തപുരം മെഡിക്കല് കോളജിലേക്ക് പോസ്റ്റ്മോര്ട്ടത്തിനായി മാറ്റുമെന്നാണ് റിപ്പോര്ട്ടുകള്.
അതേസമയം കെവിനെ തട്ടിക്കൊണ്ടുപോയ സംഘത്തിലെ പന്ത്രണ്ട് പേര്ക്കും ഡിവൈഎഫ്ഐ ബന്ധമെന്നും റിപ്പോര്ട്ടുകള്. കെവിനെ തട്ടിക്കൊണ്ടുപോകാന് ഉപയോഗിച്ച വാഹനത്തിന്റെ ഉടമസ്ഥന് ഇബ്രാഹിംകുട്ടിയെ ഇന്നലെ പൊലീസ് കസ്റ്റഡിയിലെടുത്തിരുന്നു. ഇയാളുടെ കയ്യില് നിന്ന് വാഹനം വാങ്ങിക്കൊണ്ടുപോയ നിയാസ് ഡിവൈഎഫ്ഐ തെന്മല യൂണിറ്റ് സെക്രട്ടറിയാണ്.
ഇന്ന് രാവിലെ പിടിയിലായ ഇശാലും ഡിവൈഎഫ്ഐ പ്രവര്ത്തകനാണ്. ഇടമണ് കേന്ദ്രീകരിച്ചു പ്രവര്ത്തിക്കുന്നവരാണ് സംഘത്തിലെ എല്ലാവരുമെന്നാണ് പൊലീസ് നല്കുന്ന വിവരം. ഇനി പിടിയിലാകാന് ഉള്ളവര് രണ്ട് സംഘങ്ങളായി രക്ഷപ്പെട്ടെന്നാണ് നിഗമനം. ഇവരെ പിടികൂടാന് തമിഴ്നാട് പൊലീസിന്റെ സഹായവും തേടിയിട്ടുണ്ട്.
അതിനിടെ ഗാന്ധിനഗര് പൊലീസ് സ്റ്റേഷനുമുന്നില് സംഘര്ഷമുണ്ടായി. യൂത്ത് കോണ്ഗ്രസ് പ്രവര്ത്തകര് എസ്.പിക്കുനേരെ പാഞ്ഞടുത്തു. കൊടി ഉപയോഗിച്ച് എസ്.പി മുഹമ്മദ് റഫീഖിനെ അടിക്കുകയും ചെയ്തു. തിരുവഞ്ചൂരും ഐജി വിജയ് സാഖറെയും തമ്മില് സ്ഥലത്ത് രൂക്ഷമായ വാഗ്വാദമുണ്ടായി.
പൊലീസ് സ്റ്റേഷനു മുന്നില് രമേശ് ചെന്നിത്തലയും തിരുവഞ്ചൂര് രാധാകൃഷ്ണനും കുത്തിയിരിക്കുകയാണ്. വന് പ്രതിഷേധത്തിനാണ് കോട്ടയം സാക്ഷ്യം വഹിക്കുന്നത്. കെവിനെ തട്ടിക്കൊണ്ടുപോയ കേസില് കൈക്കൂലി വാങ്ങി അന്വേഷണം വൈകിപ്പിച്ച പൊലീസുകാരുടേത് മാപ്പര്ഹിക്കാത്ത തെറ്റാണെന്ന് മുന് ആഭ്യന്തരമന്ത്രി തിരുവഞ്ചൂര് രാധാകൃഷ്ണന് ആഞ്ഞടിച്ചു.
കുറ്റക്കാര്ക്കെതിരെ കര്ശന നടപടിയെടുക്കണം എന്നും തിരുവഞ്ചൂര് പറഞ്ഞു. ഇതോടെ പ്രണയവിവാഹത്തിന്റെ പേരില് യുവതിയുടെ ബന്ധുക്കള് തട്ടിക്കൊണ്ടുപോയ കെവിന് കൊല്ലപ്പെട്ട സംഭവം സംസ്ഥാനത്ത് രാഷ്ട്രീയ വിവാദമായി വളരുകയാണ്. ചെങ്ങന്നൂരില് വോട്ടെടുപ്പ് പുരോഗമിക്കുന്നതിനിടെയാണ് സംസ്ഥാന പൊലീസ് വീണ്ടും പ്രതിക്കൂട്ടിലാകുന്നത്.
തിരോധാനക്കേസില് നടപടി വൈകിച്ച എസ്.ഐയെ സസ്പെന്ഡ് ചെയ്തതിന് പിന്നാലെ കോട്ടയം എസ്പിയെയും മാറ്റിയിരുന്നു. അന്വേഷണത്തില് വീഴ്ച വരുത്തിയ ഗാന്ധിനഗര് എസ്ഐ എം.എസ്.ഷിബുവിനാണ് സസ്പെന്ഷന്. മേല്നോട്ടത്തില് വീഴ്ച വരുത്തിയതിന് കോട്ടയം എസ്പി: മുഹമ്മദ് റഫീഖിനെ മാറ്റിനിര്ത്തുകയും ചെയ്തു.
മൂന്നുവര്ഷമായി പ്രണയത്തിലായിരുന്ന കെവിനൊപ്പം നീനുചാക്കോ ഇറങ്ങിപ്പോയതാണ് ബന്ധുക്കളെ പ്രകോപിപ്പിച്ചത്. ഇന്നലെ പുലര്ച്ചെ രണ്ടുമണിയോടെയാണ് നീനുവിന്റെ സഹോദരന്റെ നേതൃത്വത്തിലുള്ള ഗൂണ്ടാസംഘം കെവിനെയും ബന്ധു അനീഷിനെയും തട്ടിക്കൊണ്ടുപോയത്. മര്ദിച്ചവശനാക്കിയശേഷം അനീഷിനെ വഴിയില് ഉപേക്ഷിച്ചിരുന്നു. കെവിനുവേണ്ടിയുള്ള തിരച്ചില് നടക്കുന്നതിനിടെയാണ് മൃതദേഹം കണ്ടെത്തിയത്.