കൊല്ലുന്ന ഇന്ധന വില:നിയമസഭയിലേക്ക് കാളവണ്ടിയില്‍ വരാന്‍ പ്രവേശന പാസ് അനുവദിക്കണമെന്ന് ആവശ്യപ്പെട്ട് ഉത്തര്‍പ്രദേശിലെ കോണ്‍ഗ്രസ് എം.എൽ.എ
ലക്നൗ: ഇന്ധന വില വര്‍ധനവിന്‍റെ പശ്ചാത്തലത്തില്‍ നിയമസഭയിലേക്ക് കാളവണ്ടിയില്‍ വരാന്‍ പ്രവേശന പാസ് അനുവദിക്കണമെന്ന് ആവശ്യപ്പെട്ട് ഉത്തര്‍പ്രദേശ് എം.എൽ.എ.കോണ്‍ഗ്രസ് നിയമസഭാംഗമായ ദീപക് സിങ് ആണ് വ്യത്യസ്ത ആവശ്യത്തിനു പിന്നില്‍.
‘പെട്രോള്‍, ഡീസല്‍ വില വര്‍ധന നിയന്ത്രിക്കുന്നതില്‍ ബി.ജെ.പി സര്‍ക്കാര്‍ പരാജയപ്പെട്ടതിനാല്‍ ഈ വര്‍ഷം മുഴുവന്‍ നിയമസഭാ വളപ്പില്‍ പ്രവേശിപ്പിക്കാന്‍ കാളവണ്ടിക്ക് പ്രവേശന പാസ് അനുവദിച്ചു തരുവാന്‍ താങ്കളോട് അപേക്ഷിക്കുന്നു. എനിക്കും മറ്റ് അംഗങ്ങള്‍ക്കും യാത്ര ചെയ്യുന്നതിനായി അത് ഉപയോഗിക്കാന്‍ സാധിക്കും.’ -വിധാന്‍ പരിഷത്ത് പ്രിന്‍സിപ്പല്‍ സെക്രട്ടറിക്കെഴുതിയ കത്തില്‍ ദീപക് സിങ് ചൂണ്ടിക്കാട്ടുന്നു
നേരത്തെ ക്രിക്കറ്റ് താരം വിരാട് കോഹ്ലിയുടെ ഫിറ്റ്നസ് ചലഞ്ച് സ്വീകരിച്ച്‌ വ്യായാമം ചെയ്യുന്ന ദൃശ്യം ഉടന്‍ ട്വിറ്ററിലിടുമെന്ന് അറിയിച്ച മോദിയെ ഇന്ധനവില കുറക്കുന്നതിന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഫ്യുവല്‍ ചലഞ്ചിന് വെല്ലുവിളിച്ച്‌ ട്വീറ്റ് ചെയ്തിരുന്നു.
അഴിമതിക്കു കടിഞ്ഞാണിടുന്നതിലും ഇന്ധനവില വര്‍ധന നിയന്ത്രിക്കുന്നതിലും പരാജയപ്പെട്ട മോദി സര്‍ക്കാറിക്കെതിരെ പ്രതിഷേധിക്കുന്നതിന്‍റെ ഭാഗമായി ഇന്ന് വഞ്ചനാ ദിനം ആചരിക്കാന്‍ കോണ്‍ഗ്രസ് ആഹ്വാനം ചെയ്തിട്ടുണ്ട്.
