സിനിമ സെറ്റിൽ സ്ക്രിപ്റ്റും പണവും മോഷണം; രണ്ട് യുവാക്കൾ അറസ്റ്റിൽ
കോഴിക്കോട് സിനിമാ സെറ്റിൽ സാധന സാമഗ്രികളും പണവും കവർന്ന യുവാക്കൾ അറസ്റ്റിലായി. കോഴിക്കോട് കണയങ്കോട് കൊപ്ര പാണ്ടിക വീട്ടിൽ ആഷിക്, നടേരി സ്വദേശി കണ്ണാറ്റിട വയൽക്കുനി നിഷാദ് എന്നിവരെയാണ് കൊയിലാണ്ടി പൊലീസ് അറസ്റ്റ് ചെയ്തത്.
വെങ്ങളം ബൈപാസിനു സമീപം സ്വകാര്യ ലോഡ്ജിൽ ഷൂട്ടിംഗിന് വേണ്ടി താമസിച്ചു വരികയായിരുന്ന സിനിമാ പ്രവർത്തകരുടെ സ്ക്രിപ്റ്റ്, കംപ്യൂട്ടർ, മൊബൈൽ ഫോൺ, വസ്ത്രങ്ങൾ, 50, 000- രൂപ എന്നിവ കവർന്ന കേസിലാണ് പ്രതികൾ അറസ്റ്റിലായത്. സിസിടിവി ദൃശ്യങ്ങൾ പരിശോധിച്ചാണ് പ്രതികളെ പോലീസ് വലയിൽ വീഴ്ത്തിയത്.
ലഹരി വസ്തുക്കൾ ഉപയോഗിക്കുന്ന യുവാക്കൾ നേരത്തെ ഇത്തരം കേസുകളിൽ പ്രതികളാണെന്ന് പൊലീസ് പറഞ്ഞു. സിനിമാ പ്രവർത്തകരുടെ സ്ക്രിപ്റ്റ് ഉൾപ്പെടെയുള്ള സാധനങ്ങൾ മോഷ്ടിക്കപ്പെട്ടതിനാൽ ഷൂട്ടിംഗ് നിർത്തിവച്ചിരുന്നു. ഡയറക്ടർ നൽകിയ പരാതിയെ തടർന്ന് നടന്ന അന്വേഷ്ണത്തിൽ പ്രതിക്കൾ പോലീസ് വലയിലാവുകയായിരുന്നു.
പരാതി നൽകി 48- മണിക്കൂറിനകമാണ് പ്രതികൾ വലയിലായത്. സിഐ കെ. ഉണ്ണികൃഷ്ണൻ, എസ്ഐ വി. വിജേഷ്, സാജു എബ്രാഹം, കെ. ബാബുരാജ്, എന്നിവരാണ് പ്രതികളെ പിടികൂടിയത്.