ശ്രീജിത്ത് സമരം അവസാനിപ്പിച്ചു
31 January 2018
തിരുവനന്തപുരം: സഹോദരന്റെ മരണത്തിന് ഉത്തരവാദികളായവരെ നിയമത്തിന് മുന്നിൽ കൊണ്ടുവരണമെന്ന ആവശ്യവുമായി സെക്രട്ടറിയേറ്റിനു മുന്നിൽ നടത്തിവന്ന സമരം ശ്രീജിത്ത് അവസാനിപ്പിച്ചു.ഇന്ന് സി.ബി.ഐക്ക് മുന്നിൽ ഹാജരായി ശ്രീജിത്തും അമ്മയും മൊഴി നൽകിയിരുന്നു.
ഇനിയും സമരം തുടരുന്നതുകൊണ്ട് കാര്യമില്ല. സി.ബി.ഐയിൽ പൂർണ വിശ്വാസമുണ്ട്. ഇനി സി.ബി.ഐ അന്വേഷിക്കട്ടെ എന്നും ശ്രീജിത്ത് മാധ്യമങ്ങളോട് പറഞ്ഞു.
നേരത്തെ, സി.ബി.ഐ അന്വേഷണം പ്രഖ്യാപിച്ച അവസരത്തിൽ അന്വേഷണ നടപടികൾ തുടങ്ങിയാൽ മാത്രമേ സമരം അവസാനിപ്പിക്കൂവെന്ന നിലപാടിലായിരുന്നു ശ്രീജിത്ത്. രണ്ടു മണിക്കൂർ നീണ്ട മൊഴി എടുക്കലിനു ശേഷമാണ് സമരം അവസാനിപ്പിക്കാൻ ശ്രീജിത്ത് തീരുമാനിച്ചത്.