നെടുമ്പാശ്ശേരിയിൽ കൊക്കെയ്നുമായി യുവതി ആറൻസ്റ്റിലായ സംഭവം; നിർണായക വിവരങ്ങളുമായി പോലീസ്

കൊ​ച്ചി: നാടിനെ നടുക്കിയ 25 കോ​ടി രൂ​പ​യു​ടെ കൊക്കെയ്ൻ വേട്ടയിൽ പോലീസിന് നിർണായക വിവരങ്ങൾ ലഭിച്ചു. നെടുമ്പാശ്ശേരി വിമാനത്താവളത്തിൽ നിന്ന് കൊക്കെയ്നുമായി എത്തിയ ജൊ​ഹ​ന്ന (36) എന്ന ഫിലിപ്പൈൻസ് യുവതി ബ്രസീലിൽ നിന്നാണ് കൊക്കെയ്ൻ എത്തിച്ചതെന്ന് പോലീസ് സ്ഥിരീകരിച്ചു.

കൊച്ചിയിലെ ഒരു ആഡംബര ഹോട്ടലിൽ യുവതിക്ക് വേണ്ടി മുറി ബുക്ക് ചെയ്തിരുന്നു. ഇവിടെ കൊക്കെയ്ൻ എത്തിക്കാനായിരുന്നു ഇവർക്ക് ലഭിച്ചിരുന്ന നിർദ്ദേശം. ഇതുമായി സംബന്ധിച്ചു കൊച്ചിയിലെ ഹോട്ടലിൽ പോലീസ് പരിശോധന നടത്തിയിരുന്നു.

മുൻപ് മയക്കുമരുന്ന് കേസിൽ അറസ്റ്റിലായവരിൽ നിന്നാണ് കൊക്കെയ്നുമായി ഫിലിപ്പൈൻസ് യുവതി വരുന്നുണ്ടെന്ന വിവരം പോലീസിന് ലഭിച്ചത്. ഇ​തി​ന്‍റെ അ​ടി​സ്ഥാ​ന​ത്തി​ൽ നാ​ർ​ക്കോ​ട്ടി​ക്സ് ക​ണ്‍​ട്രോ​ൾ ബ്യൂ​റോ (എ​ൻ​സി​ബി) ജാ​ഗ്ര​ത പാ​ലി​ച്ചി​രു​ന്നു.

തിങ്കളാഴ്ചയാണ് നെടുമ്പാശ്ശേരി അ​ന്താ​രാ​ഷ്ട്ര വി​മാ​ന​ത്താ​വ​ള​ത്തി​ൽ നിന്ന് 25 കോ​ടി രൂ​പ​യു​ടെ മ​യ​ക്കു​മ​രു​ന്നു​മാ​യി ജൊ​ഹ​ന്ന അ​റ​സ്റ്റി​ലാ​യ​ത്. 4.8 കി​ലോ​ഗ്രാം കൊ​ക്കൈ​യ്ൻ​ ഇവരിൽ നി​ന്നു പി​ടി​ച്ചെ​ടു​ത്തിരുന്നു.

അറസ്റ്റിലായ  യുവതിയിൽ നിന്നും കൂടുതൽ വിവരങ്ങൾ ലഭിക്കുമെന്നാണ് നാർക്കോട്ടിക് കൺട്രോൾ ബ്യൂറോയുടെ പ്രതീക്ഷ.