ഡോക ലാ വിഷയം പോലുള്ളവ ഭാവിയിൽ വർധിക്കുമെന്ന് കരസേനാ മേധാവി
ന്യൂഡൽഹി: ഡോക ലാ വിഷയം പോലുള്ളവ ഭാവിയിൽ കൂടുതലായി സംഭവിക്കുമെന്ന് കരസേനാ മേധാവി ബിപിൻ റാവത്ത്. അതിർത്തിയിൽ ചൈന കടന്നുകയറ്റ ശ്രമങ്ങൾ നടത്തുകയാണെന്നും ഇതിൽ ഇന്ത്യക്ക് ആശങ്കയുണ്ടെന്നും ഇത്തരം കടന്നുകയറ്റങ്ങൾ ഭാവിയിൽ കൂടുതലായി സംഭവിച്ചേക്കുമെന്നും റാവത്ത് പറഞ്ഞു. പൂന സർവകലാശാലയിൽ ക്ലാസെടുത്തു സംസാരിക്കവെയായിരുന്നു അദ്ദേഹത്തിന്റെ പരാമർശം. അതിർത്തി പ്രശ്നങ്ങൾ ഇപ്പോൾ നയതന്ത്ര തലത്തിലാണ് പരിഹരിക്കുന്നതെന്നും ഭാവിയിലും ഇതുതന്നെ തുടരാനാണ് ഇന്ത്യ ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു.
സിക്കിം, അരുണാചൽ, ലഡാക് അതിർത്തികളിൽ ഇന്ത്യ ചൈനയുമായി സംഘർഷത്തിലാണ്. ജൂണ് 16നു സിക്കിം അതിർത്തിയോടു ചേർന്ന ഡോക ലായിൽ ചൈനീസ് സേന റോഡ് നിർമിക്കുന്നത് ഇന്ത്യ തടഞ്ഞതോടെയാണ് മേഖലയിൽ സംഘർഷം ആരംഭിച്ചത്. ഭൂട്ടാന്റെ പ്രദേശത്തെ അനധികൃത നിർമാണം തടയാൻ ഇന്ത്യൻ സേന അവിടേക്കു ചെല്ലുകയായിരുന്നു. ഡോകാ ലായിൽ മൂന്നുമാസമായി ഇന്ത്യയുടെയും ചൈനയുടെയും സൈനികർ മുഖാമുഖം നില്ക്കുകയാണ്. ഇന്ത്യ-ഭൂട്ടാൻ-ചൈന അതിർത്തികൾ സംഗമിക്കുന്ന പ്രദേശത്താണ് ഡോക ല.