അതിരപ്പിളളി വൈദ്യുത പദ്ധതിയുടെ നിര്മാണം തുടങ്ങി: കെഎസ്ഇബിയുടെ നീക്കം അതീവരഹസ്യമായി
അതിരപ്പിളളി ജലവൈദ്യുത പദ്ധതിയുടെ നിര്മാണ പ്രവര്ത്തനങ്ങള് തുടങ്ങിയതായി കെഎസ്ഇബി. പദ്ധതി പ്രദേശത്ത് വൈദ്യുതി ലൈന് വലിക്കുകയും ട്രാന്സ്ഫോര്മര് സ്ഥാപിക്കുകയും ചെയ്തതായി കെഎസ്ഇബി കേന്ദ്ര വനം പരിസ്ഥിതി മന്ത്രാലയത്തെ അറിയിച്ചു. പാരിസ്ഥിതിക അനുമതി അവസാനിച്ച ജൂലൈ 18ന് മുന്പാണ് അഞ്ചുകോടിയുടെ നിര്മാണ പ്രവര്ത്തനങ്ങള് ആരംഭിച്ചതെന്നും കെഎസ്ഇബി വ്യക്തമാക്കിയിട്ടുണ്ട്.
അതീവരഹസ്യമായാണ് കെഎസ്ഇബിയുടെ നീക്കം. കൂടാതെ അണക്കെട്ട് നിര്മിച്ചാല് മുങ്ങിപ്പോകുന്ന വനത്തിനു പകരം വനം വച്ചുപിടിപ്പിക്കാനുള്ള നഷ്ടപരിഹാരത്തുകയായി അഞ്ചു കോടി രൂപ വനംവകുപ്പിനു കൈമാറിയിട്ടുണ്ട്.
മുന്നണിക്കുള്ളില്നിന്ന് സിപിഐയും പുറത്തുനിന്നു പ്രതിപക്ഷവും പരിസ്ഥിതിപ്രവര്ത്തകരും സ്ഥലത്തെ ആദിവാസികളും പദ്ധതിയെ എതിര്ക്കുന്ന സാഹചര്യത്തിലാണ് നിര്മാണപ്രവൃത്തികള് ആരംഭിച്ചത്. അതിരപ്പിള്ളി പദ്ധതിയുമായി സര്ക്കാര് മുന്നോട്ട് പോവുകയാണെന്ന് വൈദ്യുതമന്ത്രി എം.എം. മണി കഴിഞ്ഞ ദിവസം നിയമസഭയില് പറഞ്ഞിരുന്നു.