36 റാഫേൽ വിമാനങ്ങൾ ഇന്ത്യ വാങ്ങുന്നു
16 April 2016
വർഷങ്ങളായുള്ള കൂടിയാലോചനകൾക്കൊടുവിൽ ഫ്രാൻസിന്റെ റാഫെൽ യുദ്ധവിമാനങ്ങൾ വാങ്ങാനുള്ള കരാറിന് അന്തിമ രൂപമായി. 8.8 ബില്ല്യൺ യൂറോ യ്ക്കാണ് 36 വിമാനങ്ങൾ വാങ്ങുന്നത്. മൂന്നാഴ്ചകൾക്കുള്ളിൽ കരാർ ഒപ്പുവയ്ക്കും. 18 മാസം കാലാവധിക്കുള്ളിൽ യുദ്ധവിമാനങ്ങളുടെ ആദ്യ സംഘം ഇന്ത്യയ്ക്ക് ലഭിക്കുമെന്നും പ്രതിരോധ മന്ത്രാലയ വക്താക്കൾ അറിയിച്ചു.
കഴിഞ്ഞ വര്ഷം തന്നെ യുദ്ധവിമാനങ്ങൾ വാങ്ങുന്നത് സംബന്ധിച്ച് പ്രധാനമന്ത്രി നരേന്ദ്ര മോഡി സ്ഥിരീകരണം നടത്തിയിരുന്നെങ്കിലും വിലയുടെ കാര്യം തീരുമാനമായിരുന്നില്ല. . ഈ വർഷം ജനുവരിയിൽ ഫ്രഞ്ച് പ്രസിഡന്റ് ഫ്രാൻസ്വാ ഒലാന്ദ് ഇന്ത്യ സന്ദർശനത്തിനെത്തിയ വേളയിൽ റാഫേൽ വിമാനങ്ങൾ വാങ്ങുന്നത് സംബന്ധിച്ച് ധാരണാ പത്രത്തിൽ ഒപ്പുവച്ചിരുന്നു.12 ബില്ല്യൺ ആണ് ഫ്രാൻസ് ആദ്യം ആവശ്യപ്പെട്ടതെങ്കിലും പിന്നീട് 8.8 ബില്ല്യണിൽ ധാരണയിലെത്തുകയായിരുന്നു. ആദ്യം 120 വിമാനങ്ങൾ വാങ്ങാൻ ആണ് ഉദ്ദേശിച്ചിരുന്നതെങ്കിലും വില തർക്കത്തെ തുടർന്ന് 36 ആക്കുകയായിരുന്നു. 2017 ഓടെ പഴയ യുദ്ധ വിമാനങ്ങൾ മാറ്റേണ്ടതുണ്ടെന്നുള്ള വ്യോമസേനയുടെ ശക്തമായ ആവശ്യത്തെ തുടര്ന്നാണ് ഇപ്പോൾ പുതിയ റാഫേൽ വിമാനങ്ങൾ വാങ്ങുന്നത്. ഫ്രഞ്ച് കമ്പനിയായ ദസാൾട്ട് ഏവിയേഷൻ ആണ് റാഫേൽ വിമാനങ്ങൾ നിർ മ്മിക്കുന്നത്.