ബാര് ലൈസന്സുകള് മൗലിക അവകാശമല്ല; മദ്യത്തിന്റെ ലഭ്യത കുറയ്ക്കുന്നത് മദ്യ ഉപഭോഗം കുറയ്ക്കാന് കാരണമാകുമെന്ന് സുപ്രീംകോടതി
ന്യൂഡല്ഹി: മദ്യത്തിന്റെ ലഭ്യത കുറയ്ക്കുന്നത് മദ്യ ഉപഭോഗം കുറയ്ക്കാന് കാരണമാകുമെന്ന് സുപ്രീംകോടതി. ബാര് ലൈസന്സുകള് മൗലിക അവകാശമല്ല. ഘട്ടം ഘട്ടമായുള്ള മദ്യനിരോധനത്തിന്റെ തുടക്കമായി ബാറുകള് നിര്ത്തിയതിനെ കണ്ടുകൂടെയെന്നും ഫയലുകള് ഇക്കാര്യം പറയുന്നുണ്ടല്ലോയെന്നും കോടതി അഭിപ്രായപ്പെട്ടു. സംസ്ഥാന സര്ക്കാരിന്റെ മദ്യനയത്തെ ചോദ്യം ചെയ്ത് ബാര് ഉടമകള് സമര്പ്പിച്ച ഹര്ജിയിലെ വാദത്തിനിടെയായിരുന്നു കോടതിയുടെ പരാമര്ശം.
ഉമ്മന് ചാണ്ടിയും സുധീരനും തമ്മിലുള്ള തര്ക്കമാണോ മദ്യനയത്തിലേക്ക് നയിച്ചതെന്നും കോടതി ചോദിച്ചു. നയത്തിന് മുമ്പ് സര്ക്കാര് എല്ലാവശങ്ങളും പരിശോധിച്ചിട്ടുണ്ടാകുമെന്നും കോടതി പറഞ്ഞു.
മദ്യം വീട്ടില് വാങ്ങി വച്ച് കഴിക്കുന്നത് വലിയ തെറ്റല്ല. വീട്ടില് വച്ച് കഴിക്കുന്നതിനെ അസംബന്ധമെന്ന് പറയാനാകില്ല. കുറ്റകൃത്യങ്ങള് കുറയ്ക്കാനുള്ള ശ്രമങ്ങള് പ്രോത്സാഹിപ്പിക്കേണ്ടേയെന്നും കോടതി ചോദിച്ചു. ഉച്ചയ്ക്ക് ശേഷം അന്തിമവാദം തുടരും.