എംബിബിഎസ് വിജയകരമായി പൂർത്തിയാക്കി നടി ശ്രീലീല

എംബിബിഎസ് വിജയകരമായി പൂർത്തിയാക്കിയിരിക്കുകയാണ് പ്രശസ്ത തെന്നിന്ത്യൻ നടി. കഴിഞ്ഞ വർഷം ഏപ്രിലിൽ മെഡിക്കൽ വിദ്യാഭ്യാസം നടി വിജയകരമായി പൂർത്തിയാക്കിയിരുന്നു . ഇപ്പോൾ ശ്രീലീലയുടെ ബിരുദദാന ചടങ്ങുകളിലെ ചിത്രങ്ങളാണ് ശ്രദ്ധേയമാകുന്നത്. സിനിമയും പഠനവും ഒരുമിച്ച് കൊണ്ടുപോകാൻ ശ്രീലീല കാണിച്ച ധൈര്യത്തിന് ആരാധകരും കയ്യടിക്കുകയാണ്.

ശ്രീലീലയുടെ അമ്മ ​ഗൈനക്കോളജിസ്റ്റാണ്. അമേരിക്കയിലാണ് ശ്രീലീല ജനിച്ചതും വളർന്നതുമൊക്കെ. സിനിമയിൽ സജീവമായതിന് പിന്നാലെയാണ് താരം ഇന്ത്യയിൽ സ്ഥിരമാക്കിയത്. അമ്മയെപ്പോലെ ഡോക്ടർ ആകണമെന്നായിരുന്നു ശ്രീലീലയുടെ ആ​ഗ്രഹം.

വളരെ ചെറിയ പ്രായത്തിൽ തന്നെ കുട്ടികളെ ദത്തെടുത്ത ശ്രീലീല ഇപ്പോൾ മൂന്ന് കുഞ്ഞുങ്ങളുടെ അമ്മ കൂടിയാണ്. 2022 ഫെബ്രുവരിയിൽ വെറും 22 വയസുള്ളപ്പോഴാണ് ഗുരു, ശോഭിത എന്നീ രണ്ട് ഭിന്നശേഷിക്കാരായ കുട്ടികളെ ശ്രീലീല ദത്തെടുത്തത്. ജൂണിൽ 24-ാം പിറന്നാളിന് മുമ്പ്, 2025 ഏപ്രിലിൽ അവർ ഒരു പെൺകുഞ്ഞിനെയും ദത്തെടുത്തു.

അതേസമയം ശിവകാർത്തികേയൻ നായകനായെത്തിയ പരാശക്തിയാണ് ശ്രീലീലയുടേതായി ഒടുവിൽ തിയറ്ററുകളിലെത്തിയ ചിത്രം. ധനുഷ് നായകനായെത്തുന്ന ഡി 55 ആണ് ശ്രീലീലയുടേതായി അണിയറയിൽ ഒരുങ്ങുന്ന പുതിയ ചിത്രം.