ഉക്രൈൻ യുദ്ധം ഇന്ത്യ വിചാരിച്ചാൽ നിർത്താനാകില്ലല്ലോ; പാചക വാതക വില വർദ്ധനവിൽ വി മുരളീധരൻ

രാജ്യ വ്യാപകമായ പാചക വാതക വില വർദ്ധനയിൽ വിചിത്ര ന്യായീകരണവുമായി കേന്ദ്ര സഹമന്ത്രി വി മുരളീധരൻ . ഉക്രൈൻ യുദ്ധം ഇന്ത്യ വിചാരിച്ചാൽ നിർത്താനാകില്ലല്ലോ? എന്നായിരുന്നു അദ്ദേഹത്തിന്റെ പ്രതികരണം. കേന്ദ്രസർക്കാർ നികുതി കുറച്ചതിന്റെ ആനുപാതികമായി കേരളവും കുറയ്ക്കണം. ആകെയുള്ള നികുതിയുടെ പകുതി സംസ്ഥാനത്തിന് കിട്ടുന്നുവെന്നും അദ്ദേഹം അഭിപ്രായപ്പെട്ടു.

മാത്രമല്ല, കേരളത്തിലെ ഭരണ പ്രതിപക്ഷ നേതൃത്വം മത മൗലികവാദികളുടെ പിടിയിലാണെന്നും അദ്ദേഹം അഭിപ്രായപ്പെട്ടു. പൊതുവേദിയിൽ പെൺകുട്ടിയെ സമസ്ത നേതാവ് അപമാനിച്ചതിൽ ഭരണ – പ്രതി പക്ഷത്തിന് മൗനമാണ്. പെൺകുട്ടി അവിടേക്ക് ഹിജാബിട്ട് വന്നിട്ടും വിലക്കി.

കേരളത്തിൽ പി സി ജോർജിന് ഒരു നീതി മുസ്ലിയാർക്ക് മറ്റൊരു നീതി എന്നതാണ് അവസ്ഥയെന്നും മുരളീധരൻ വിമർശിച്ചു. അതേപോലെ തന്നെ, വിലക്കയറ്റം തടയാൻ സംസ്ഥാനം സഹകരിക്കുന്നില്ല. കേന്ദ്രത്തെ പഴിചാരി സംസ്ഥാനം രക്ഷപെടുന്നു. നികുതി കുറയ്ക്കാൻ സർക്കാർ തയ്യാറാകുന്നില്ല. നവംബറിൽ കേന്ദ്രം വില കുറച്ചു. ഇന്ധന നികുതിയുടെ ഒരു വിഹിതം കേരളത്തിന് ലഭിക്കുന്നുണ്ടെന്നും മുരളീധരൻ പറഞ്ഞു.